Shtetet e Bashkuara do të largohen nga Irani “goxha shpejt” dhe do të rikthehen për “goditje pikash”, nëse ka nevojë, i tha të mërkurën agjencisë “Reuters” presidenti amerikan, Donald Trump, disa orë para se të mbajë një adresim para kombit rreth luftës.
Kur konflikti është në javën e pestë dhe Trumpi është nën trysni për të gjetur një rrugëdalje në kohën e shtrenjtimit të naftës, presidenti caktoi një fjalim për në orën 21:00 sipas kohës lokale për ta diskutuar rrugën tutje, raporton agjencia e lajmeve “Reuters”.
Në një intervistë telefonike me agjencinë “Reuters”, Trumpi tha se një element i fjalimit të tij do të jetë shprehja e neverisë ndaj NATO-s për atë që ai e konsideron mungesë të mbështetjes nga aleanca për objektivat e Shteteve të Bashkuara në Iran.
Përplasja transatlantike në mandatin e dytë të Trumpit u thellua, pasi aleatët evropianë iu përgjigjën negativisht kërkesës së tij për të ofruar ndihmë në ofrimin e kalimit të sigurt për tërë transportin e naftës nëpër Ngushticën e Hormuzit.
Ai tha se “absolutisht” është duke e shqyrtuar tërheqjen e Shteteve të Bashkuara nga NATO-ja, organizatë e ratifikuar nga Senati i ShBA-së më 1949. Trumpi e ka përmendur tërheqjen nga aleanca edhe në të kaluarën dhe me sukses u ka bërë presion vendeve anëtare që t’i rrisin shpenzimet e mbrojtjes.
“Ata s’kanë qenë miq, kur kishim nevojë për ta. Kurrë nuk kërkuam shumë nga ta… ishte rrugë njëdrejtimëshe” – tha kreu i Shtëpisë së Bardhë.
Trumpi dhe zyrtarët e tij kanë paraqitur afate të ndryshme për përfundimin e luftës. Ai tha të martën se ShBA-ja mund t’i japë fund fushatës ushtarake kundër Iranit brenda dy deri tri javësh.
Në intervistën e tij me agjencinë “Reuters”, ai refuzoi që të jepte ndonjë afat.
“Nuk mund t’ju tregoj saktësisht…. do të jemi jashtë [Iranit] goxha shpejt” – tha ai, duke shtuar se porsa të arrihet largimi, “do të kthehemi për të bërë goditje pikash” mbi caqe iraniane sipas nevojës.
Sipas presidentit amerikan, udhëheqja e re e Iranit tani përbëhet nga “njerëz tërësisht të ndryshëm”.
“Nuk kisha nevojë për ndërrim regjimi, por e morëm për shkak të viktimave të luftës. E morëm. Pra, kemi ndërrim të regjimit dhe gjëja e madhe që e kemi është që ata nuk do të kenë një armë bërthamore, as që dëshirojnë një të tillë” – tha Trumpi./Nacionale
