Ministria e Kulturës, Rinisë dhe Sportit ka anuluar ceremoninë e paralajmëruar për 10 korrik, e cila do të shënonte fillimin e punimeve për ndërtimin e palestrës së gjimnastikës në Fushë Kosovë, për shkak se projekti nuk posedon ende leje ndërtimi.
Në një përgjigje për Insajderin, MKRS ka deklaruar se ceremonia shtyhet deri në pajisjen me leje ndërtimore, në përputhje të plotë me legjislacionin në fuqi.
“Ministria e Kulturës, Rinisë dhe Sportit njofton se ceremonia e paralajmëruar për fillimin e punimeve në projektin “Ndërtimi i Palestrës së Gjimnastikës në Fushë Kosovë” është anuluar dhe do të shtyhet deri në momentin e pajisjes me leje ndërtimore, në përputhje të plotë me legjislacionin në fuqi”, thuhet në përgjigjen e tyre.
Ministria shton se do të angazhohet për respektim të procedurave ligjore dhe është e gatshme të bashkëpunojë me Komunën e Fushë Kosovës për realizimin e projektit.
“MKRS riafirmon angazhimin e saj për respektimin e procedurave ligjore dhe shpreh gatishmërinë e plotë për bashkëpunim me Komunën e Fushë Kosovës, në funksion të realizimit të këtij projekti të rëndësishëm për sportin dhe komunitetin, duke kontribuar kështu në zbehjen e precedentëve të cenimit të ligjshmërisë me rastin e fillimit të projekteve investive nga institucionet publike pa lejet që përcaktohen me ligjet e aplikueshme“.
Përkundër, komunës MKRS ka mohuar se kanë nisur punimet në këtë hapësirë publike.
“Në rastin konkret, MKRS sqaron se punimet nuk kanë filluar, megjithëse është nënshkruar kontrata për ekzekutim të projektit, i cili, paraprakisht ka marr kushte ndërtimore nga Komuna e Fushë Kosovës dhe është caktuar lokacioni poashtu nga Komuna. Megjithatë, procedura e marrjes së lejes është filluar dhe punimet do të fillojnë vetëm pas skadimit të afatit ligjor për marrjen e lejes” thuhet në përgjigjen zyrtare.
Një ditë më parë, përmes një reagimi Komuna e Fushë Kosovës njoftoi se investimi në fshatin Miradi e Ulët ka nisur pa leje ndërtimi dhe se nuk ishte paraqitur asnjë kërkesë zyrtare për leje.
“Paralelisht me këtë, komuna ka pranuar një ftesë për të marr pjesë në ceremoninë inauguruese lidhur me këtë investim. Pas këtyre njoftimeve për fillimin e ndërtimit të palestrës së gjimnastikës dhe ceremonisë së planifikuar për nesër më datën 10.07.2025, (e enjte), ne jemi të obliguar të ju informojmë se investimi në fjalë nuk është i pajisur me leje ndërtimore dhe për të njëjtin nuk ka asnjë kërkesë”, thuhet pos tjerash në reagimin e Komunës.
Për më tepër, Komuna paralajmëroi se çdo ndërtim pa leje do të ndërpritet dhe rrënohet, pavarësisht se ajo ka ndarë tokën për këtë projekt.
