Një qytetar ka dorëzuar një shumë parash të gjetura në fshatin Shupkovc të Mitrovicës në Stacionin Policor Jugu, gjatë orëve të pasdites së sotme.
Lajmin e ka bërë të ditur Policia e Kosovës përmes një njoftimi zyrtar, duke theksuar se janë në kërkim të pronarit të shumës së humbur. Të gjithë ata që pretendojnë se u kanë humbur para në këtë zonë, ftohen të paraqiten në Stacionin Policor Jugu në Mitrovicë ose të kontaktojnë në numrin 192.
Policia ka falënderuar qytetarin për përgjegjshmërinë dhe bashkëpunimin e treguar, duke e cilësuar veprimin e tij si shembull të ndershmërisë dhe qytetarisë aktive.
