Policia hungareze ka arrestuar shtatë punonjës të bankës shtetërore ukrainase Oschadbank, ndërsa po transportonin një ngarkesë prej rreth 80 milionë dollarësh në para të gatshme dhe ar përmes territorit hungarez, një akt ky që ka nxitur menjëherë akuza të ashpra nga Kievi për marrje pengjesh dhe terrorizëm shtetëror.
Incidenti, i cili ndodhi dje, i ka përkeqësuar më tej marrëdhëniet tashmë shumë të tendosura midis dy kombeve, si pasojë e një sërë mosmarrëveshjesh të thella mbi furnizimin me energji dhe ndihmën e bllokuar të Bashkimit Evropian për Ukrainën.
Sipas deklaratave të Oschadbank, të arrestuarit ishin punonjës që po kryenin një transferim rutinë të valutave të huaja dhe metaleve bankare nga dega e Raiffeisen Bank në Austri drejt Ukrainës, në çastin kur dy automjetet e tyre të blinduara u ndaluan nga policia hungareze. Sendet me vlerë përfshinin 40 milionë dollarë, 35 milionë euro dhe 9 kilogramë ar me një vlerë prej rreth 700.000 dollarësh. Sipas mediave vendase, konkretisht Telex, Qendra Hungareze Kundër Terrorizmit shënjestroi makinat e transportit me para në dorë të regjistruara në Ukrainë në një pikë karburanti në autostradën M5, një rrugë drejt jugut që të çon në drejtim të Serbisë dhe jo drejt kufirit me Ukrainën.
Autoriteti tatimor hungarez deklaroi se shtatë ukrainasit u vendosën në paraburgim nën dyshimin për pastrim parash, ndërkohë që është shumë interesante të theksohet se Raiffeisen ka qenë në listën e zezë ukrainase për shkak të pranisë së saj të vijueshme në Rusi që nga shpërthimi i luftës, duke dështuar të adresojë pasojat e operacioneve të saj mbi të drejtat e njeriut.
Raiffeisenbank Russia, akuzohet hapur për ofrimin e shërbimeve të pagesave dhe kontributeve tatimore që rrezikojnë të kontribuojnë materialisht në përpjekjet ruse të luftës. Ky qëndrim i Ukrainës ka shkaktuar fërkime të forta edhe me Austrinë.
Një nga të arrestuarit thuhet se është një ish-gjeneral i shërbimit sekret ukrainas, fakt që i shton më tej dozat e misterit, sidomos kur merret parasysh se Ukraina është zhvendosur masivisht drejt pagesave dixhitale dhe nuk është më kryesisht një vend që operon me para në dorë.
Sipas Bankës Kombëtare të Ukrainës, pagesat online përbëjnë 95.5 për qind të transaksioneve. Ministri i Jashtëm hungarez, Péter Szijjártó, ka kërkuar një shpjegim të menjëhershëm nga Ukraina në lidhje me këtë dërgesë, duke deklaruar se është tërësisht e arsyeshme të pyetet nëse këto përfshijnë para nga “mafia e luftës ukrainase”.
Ai pohoi se ukrainasit kanë transportuar sasi gjigante parash dhe ari përmes Hungarisë në muajt e fundit. Që nga janari janë regjistruar gjithsej 900 milionë dollarë, 420 milionë euro dhe 146 kilogramë lingota ari të transportuara përmes vendit fqinj.
Szijjártó ngriti pikëpyetje të forta se përse ukrainasit kanë nevojë të transportojnë fizikisht sasi kaq të mëdha parash, duke argumentuar se nëse ky do të ishte vërtet një transaksion midis bankave, ato duhet ta zgjidhnin me transferta bankare dhe jo duke udhëtuar përmes Hungarisë me automjete të blinduara.
Duke pasur parasysh praninë e personave me lidhje të qarta me shërbimet sekrete ukrainase, Hungaria po kërkon me ngulm të dijë nëse këto para vetëm kalojnë tranzit apo ndonjëherë ndalohen për t’u përdorur në dobi të njerëzve të caktuar brenda Hungarisë.
Në krahun tjetër, Ministri i Jashtëm i Ukrainës, Andrii Sybiha, e dënoi ndalimin në platformën X, duke e përshkruar si një vjedhje dhe marrje pengjesh nga Hungaria. Ai e lidhi këtë veprim me kërcënimet e fundit të kryeministrit Viktor Orbán për të përdorur mjete politike dhe financiare që të detyrojë Ukrainën të rihapë tubacionin e naftës Druzhba, i cili është ndërprerë që nga fundi i janarit, ndoshta për shkak të sulmeve ruse. Sybiha deklaroi se nëse kjo është “forca” e shpallur nga Orbán, atëherë ajo është forca e një bande kriminale, duke e quajtur aktin një terrorizëm shtetëror dhe shantazh. Kievi ka dërguar tashmë një notë diplomatike, duke kërkuar lirimin e menjëhershëm të personelit dhe parave, ndërsa planifikon të kërkojë një vlerësim nga BE-ja për veprimet e Hungarisë.
Banka Kombëtare e Ukrainës i përsëriti këto kërkesa, duke kërkuar informacion mbi vendndodhjen e ngarkesës, ndërsa Oschadbank e quajti ndalimin të pajustifikuar, duke këmbëngulur se ky ishte një operacion standard bankar. Megjithatë, gazetari Szabolc Panyi e cilësoi arrestimin si një operacion politik mbi baza të sajuara, në një kohë kur marrëdhëniet janë përkeqësuar edhe më shumë pas komenteve të presidentit Zelensky, i cili u shpreh se do të donte t’i dërgonte ushtrinë Orbán-it për të folur në një gjuhë që ai e kupton.
Orbán e akuzoi Zelenskyn për kërcënime dhe pretendoi ekzistencën e një komploti midis Kievit, Brukselit dhe opozitës hungareze për të dëmtuar sigurinë kombëtare të Budapestit.
Në një video të postuar sot, Orbán pretendoi se paralajmërimet e Zelenskyy ishin pjesë e një skeme për të instaluar një qeveri pro-ukrainase në Hungari, e cila do të devijonte fondet hungareze drejt Kievit dhe do të ndërpriste aksesin në energjinë ruse. Ai akuzoi partinë Tisza të Péter Magyar për bashkëpunim të fshehtë me Ukrainën dhe institucionet e BE-së, ndërsa e cilësoi si sabotim politik ndërprerjen e punës në tubacionin Druzhba.
Nisur nga situata e krijuar, Budapesti ka vendosur ushtarë për të ruajtur infrastrukturën kyçe të energjisë, ndërsa partia Fidesz e paraqet luftën dhe anëtarësimin e mundshëm të Ukrainës në BE si një kërcënim për zhvillimin e Hungarisë, duke bllokuar vazhdimisht kredinë e BE-së prej 90 miliardë eurosh për mbrojtjen e Ukrainës deri në rihapjen e tubacionit./Pamfleti nga “Brussels Signal”
