Deputeti i zgjedhur i Lëvizjes Vetëvendosje, Ilir Kërçeli, i ka reaguar Kryetaritt ë Prishtinës, Përparim Ramës, pasi ky kritikoi Qeverinë në detyrë lidhur me aksidentin me fatalitet në Autostradën “Ibrahim Rugova”.
Kërçeli i ka sugjeruar Ramës që të merret me problemet e kryeqytetit.
“Para se të flasësh për makropolitika, pastroje Kryeqytetin nga mbeturinat. Para se të flasësh për makropolitika, sill autobusët e rinj që i ke premtuar për transportin urban. Para se të flasësh për makropolitika, përfundoje eksperimentin e dështuar me komunikacionin që po ua vështirëson jetën qytetarëve çdo ditë”, ka shkruar Kërçeli.
Sipas Kërçelit, Prishtina sot përballet me më shumë probleme, më pak investime të përfunduara dhe më pak rezultate konkrete.
“I vetmi “progres” që po shihet është shlyerja e borxheve dhe obligimeve të tua politike”, ka shkruar Kërçeli.
Rama e ka quajtur qeverinë Kurti “Qeveri e propagandës, e kontratave njëburimore dhe e tragjedive që mund të parandaloheshin”.
“Për vite me radhë nuk u largua dheu nga autostrada, por sot gjenden miliona euro për kontrata. Plot 4.67 milionë euro për heqjen e dheut, pasi problemi është zvarritur pafund. Kjo është fotografia më e qartë e një qeverisjeje që reagon vetëm kur është tepër vonë”, shkroi Rama.
