Kryetari i komunës së Prishtinë, Përparim Rama, ka reaguar për herë të parë pas përfundimit të zgjedhjeve të 9 shkurtit.
Rama, përmes një postimi në facebook është shprehur se Prishtina edhe një herë dëshmoi se është zemra e demokracisë sonë si gjatë fushatës zgjedhore, ashtu edhe në ditën e zgjedhjeve.
“Sot, pas përfundimit të një procesi zgjedhor të rëndësishëm për të ardhmen e vendit tonë, dua t’ju shpreh mirënjohjen më të thellë për qytetarinë e jashtëzakonshme, maturinë demokratike dhe pjesëmarrjen tuaj aktive. Prishtina edhe një herë dëshmoi se është zemra e demokracisë sonë – si gjatë fushatës zgjedhore, ashtu edhe në ditën e zgjedhjeve”, ka shkruar Rama.
Ai i uroj fitoren VV-së, dhe shpresonë që shumë shpejt të formohet qeveria e re dhe që Prishtina të jetë një ndër prioritetet kryesore në agjendën qeverisëse.
“Urime partisë fituese. Shpresojmë që shumë shpejt të formohet qeveria e re dhe që Prishtina të jetë një ndër prioritetet kryesore në agjendën qeverisëse. Kryeqyteti nuk është vetëm një qendër urbane, por zemra e funksionimit të shtetit, motori i zhvillimit ekonomik dhe imazhi ynë në botë. Rrjedhimisht, ai kërkon një program të qartë qeverisës, investime strategjike dhe një qasje të menduar mirë për ta kthyer Prishtinën në një model të zhvillimit modern e europian. Si institucion, do të jemi të hapur për bashkëpunim, me synimin që kryeqyteti ynë të marrë vendin që i takon në hartën e zhvillimit kombëtar”, tha Rama.
Ndërsa ka shprehur mirënjohje të madhe për Lumir Abdixhikun dhe LDK-në për një fushatë model, të ndërtuar mbi parimet e kulturës politike, vizionit dhe unitetit.
“Dua të shpreh mirënjohjen e madhe për Lumir Abdixhiku dhe Lidhja Demokratike e Kosovës për një fushatë model, të ndërtuar mbi parimet e kulturës politike, vizionit dhe unitetit. LDK, nën drejtimin e tij, ka treguar se debati politik duhet të zhvillohet mbi bazën e ideve dhe alternativave konkrete, duke forcuar besimin në një të ardhme më të ndritur për Kosovën.Në këtë frymë, një mirënjohje e veçantë shkon për angazhimin e LDK-së për Prishtinën – jo vetëm si kryeqyteti i Kosovës, por si qendra e zhvillimit ekonomik, politik dhe kulturor të Republikës sonë. Një Prishtinë moderne, funksionale dhe e urbanizuar me vizion është çelësi për një Kosovë të fortë dhe konkurruese në rajon”, ka shkruar tutje Rama.
