Sadri Ramabaja, analist dhe aktivist i VV-së, ka shkruar një artikull të gjatë, ku ka pasur kritika ndaj LDK-së, Ibrahim Rugovës, Edi Ramës dhe një “lagjeje diplomatësh” të ShBA-së. Në artikullin e titulluar “Republika dhe rendi i ri ndërkombëtar: Evoluimi politik i z.Rama dhe LDK-ja”, Ramabaja ka pasur disa komente të ashpra në drejtim të figurës së Rugovës, e cila konsiderohet nga shumë shqiptarë si “baba i Pavarësisë”.
Ramabaja ka komentuar takimin e Rugovës me Sllobodan Millosheviqin, ish-president autoritar që gjerësisht njihet si “Kasap i Ballkanit”. Sipas Ramabajës, izolimi i Rugovës ngjante “më shumë një stivimi të mumjeve në morg”.
Tutje, Ramabaja ka konsideruar se “ringjallja” politike e pas luftës e Rugovës ka qenë “pjesërisht e dështuar”.
“Vajtja e Rugovës nga Beogradi për Romë dhe qëndrimi i tij për disa javë totalisht i izoluar, i ngjet më shumë një stivimi të mumjeve në morg, për t’ u rinxjerrë nga atje për qëllime eksperimentimi e studimi, si ishte vepruar me trupin e Fricit të gjetur në Alpet e Austrisë pas 5000 vitesh qëndrimi në akull e borë.
Ringjallja e tij pas luftës, kishte karakter misionar politik dhe ishte në funksion të eksperimentimit, por ai akt pjesërisht mund të vlerësohet si i dështuar. Intenca e z Rama tok me ish kryeminsitrin italina Massimo D’Alema për ta ringjallur Rugovën edhe pas atij dështimi, flet shumë për rolin që pretendohet t’i rezervohet LDK-së në jetën politike opozitare” – ka shkruar Ramabaja, ndër të tjera.
Duke cituar Mehmet Krajën, kryetar i Akademisë së Shkencave dhe Arteve të Kosovës, Ramabaja vlerëson se vitet 90-ta, kohë kur Rugova e LDK-ja udhëhiqte me Kosovën, ishin të humbura.
“Në pjesën e dytë të dekadës së apart’hedit në Kosovë (1995–1999), që përkon me periudhën post-dejtoniane, gjithë investimi i LDK-së që përmes rrugëve të veprimit liberal — reformist, duke u prezantuar si partner bashkëpunues i qendrave vendimmarrëse, ta rikthejë autonominë e humbur, dukej se do të shkonte dëm.
Në përballje me këtë rrjedhë të ngjarjeve, njëri nga themeluesit e LDK-së, aktualisht kryetar i Akademisë së Shkencavedhe Arteve e Kosovës (ASHAK), do t’i vlerësojë edhe pesëvjetëshin e parë të egzistencës së LDK-së, si “Vite të humbura”.[1] Por, nëse tutje analizohet edhe rrjedha e pjesës së mbetur të asaj dekade nën apart’hedin serb dhe sjelljet e LDK-së, pra dekada si tërësi, jo vetëm se do të mund të cilësohej si “dekadë e humbur”, por ajo do t’i humbiste kuptimin edhe përcaktimit të Sartrit, meqë qëndrimi i LDK-së do t’ na rezultoj absurd” – ka shkruar Ramabaja.
