Kryetari i Prishtinës, Përparim Rama, ka njoftuar se Komuna e Prishtinës ka dërguar njoftimin zyrtar për ndërprerjen e marrëveshjes për shfrytëzimin e hapësirës publike në Grand Hotel nga organizata e drejtuar nga Jeta Xharra.
Ky vendim vjen pas debatit të fundit lidhur me profilin e rrejshëm me emrin “Lule Gjeli”, i cili kishte publikuar materiale në mediat që drejtohen nga Xharra. Rama më herët kishte kërkuar nga Xharra që të bëjë të ditur se kush qëndron pas këtij profili.
Në reagimin e tij, Rama ka thënë se sqarimet e dhëna nga Xharra nuk kanë adresuar çështjen kryesore dhe, sipas tij, kanë ngritur edhe më shumë dilema.
“Jeta Xharra nuk paske dhënë asnjë sqarim për çështjen thelbësore. Përkundrazi, reagimi si i tillë ngriti edhe më shumë pikëpyetje”, ka shkruar Rama.
Ai ka kritikuar deklaratën se identiteti i personit që qëndron pas profilit është i njohur, por nuk do të bëhet publik.
“Deklarata se ‘e dimë kush është, por nuk e tregojmë’ është pikërisht ajo që e bën situatën edhe më shqetësuese. Nëse identiteti dihet, atëherë shtrohet një pyetje e thjeshtë: Kënd po e mbroni?”, ka deklaruar Rama.
Kryetari i Prishtinës ka thënë se përderisa nuk ka përgjigje për këto çështje, Komuna nuk mund të sillet sikur nuk ka ndodhur asgjë.
“Përderisa këto pyetje mbesin pa përgjigje, si Kryeqytet nuk mund të sillemi sikur nuk ka ndodhur asgjë”, është shprehur ai.
Rama ka theksuar se hapësirat publike në pronësi të qytetarëve nuk duhet të shfrytëzohen nga organizata që, sipas tij, nuk tregojnë transparencë për çështje me interes publik.
“Nuk mund të lejojmë që hapësirat publike, të cilat janë pronë e qytetarëve të Prishtinës, të shfrytëzohen nga organizata që, me veprimet e tyre, cenojnë interesin e qytetarëve dhe refuzojnë transparencën për çështje që lidhen drejtpërdrejt me besimin e publikut”, ka shkruar ai.
Në fund, Rama ka bërë të ditur se Komuna e Prishtinës do të rishqyrtojë edhe marrëveshje të tjera për shfrytëzimin e hapësirave publike që janë ndarë ose financuar nga Kryeqyteti.
Postimi i Perparim Rama:
Jeta Xharra nuk paske dhënë asnjë sqarim për çështjen thelbësore. Përkundrazi, reagimi si i tillë ngriti edhe më shumë pikëpyetje!
Deklarata se “e dimë kush është, por nuk e tregojmë” është pikërisht ajo që e bën situatën edhe më shqetësuese. Nëse identiteti dihet, atëherë shtrohen një pyetje e thjeshtë:
Kënd po e mbroni?
Përderisa këto pyetje mbesin pa përgjigje, si Kryeqytet nuk mund të sillemi sikur nuk ka ndodhur asgjë.
Prandaj, sot ju kemi dërguar njoftimin zyrtar për ndërprerjen e marrëveshjes për shfrytëzimin e hapësirës publike në Grand Hotel.
Nuk mund të lejojmë që hapësirat publike, të cilat janë pronë e qytetarëve të Prishtinës, të shfrytëzohen nga organizata që, me veprimet e tyre, cenojnë interesin e qytetarëve dhe refuzojnë transparencën për çështje që lidhen drejtpërdrejt me besimin e publikut.
Në ditët në vijim do të rishqyrtojmë edhe çdo marrëveshje tjetër për shfrytëzimin e hapësirave publike që janë ndarë e financuar nga Kryeqyteti.
