Veriu.info sot ka publikuar një artikull të bazuar në dokumente zyrtare të Inspektoratit Shëndetësor të Ministrisë së Shëndetësisë, ku tregohet se me raportin e inspektimit të datës 24 nëntor 2025 ishte konstatuar se spitali privat special “Fati Im” ishte licencuar kundërligjshëm në 6 veprimtari shëndetësore.
Sipas hartueses së raportit, Inspektores Shëndetësore të Ministrisë së Shëndetësisë, Bordi për Licencimin e Institucioneve Private Shëndetësor ka gabuar kur e ka licencuar spitalin special “Fati Im” në gjashtë (6) veprimtari shëndetësore, pasi që i njëjti mund të licencohet vetëm deri në katër (4) veprimtari shëndetësore.
Edhe pse Ministria e Shëndetësisë që udhëheqet nga Arben Vitia nuk kishte kthyer përgjigje për katër (4) ditë deri në publikimin e lajmit, Kryetari i Bordit për Licencimin e Institucioneve Private Shëndetësore ka zgjedhur rrjetet sociale të reagoj pas publikimit të lajmit.
Sipas Hysenit, inspektorja e rastit ka gabuar me rastin e inspektimit dhe lëshimit të raportit të inspektimit, edhe pse në vendimin e tij shkruan se spitali “Fati Im” është licencuar në 6 veprimtari.
Komentin e bërë para rreth dy ore nga Ragip Hyseni në faqen e Veriu.info në Facebook, Zyra për Informim e Ministrisë së Shëndetësisë e ka kthyer një orë më pas si qendrim zyrtar të Ministrisë që udhëheqet nga Arben Vitia në e-mailin e Veriu.info.
Veriu.info ka dërguar pyetje në këtë ministri për të marrë përgjigje, se çfarë veprime keni marrë pas konstatimit të kësaj gjendje të ‘gabuar’ në raport, por deri në momentin e publikimit të lajmit nuk kemi marrë përgjigje.
Përgjigja e Gjylferije Zabeli – Udhëheqëse e Divizionit për Komunikim me Publikun në Ministrinë e Shëndetësisë:
Me qëllim të informimit të saktë dhe të drejtë të publikut lidhur me lajmin e publikuar, ju njoftojmë si në vijim:
Inspektor znj. Ajla Zymber Çeshko me rastin e inspektimit dhe lëshimin e raportit të Inspektimit nuk ka vepruar sipas Udhëzim Administrativ nr. 03/2025 kushtet dhe procedurat për ushtrimin e veprimtraisë shëndetësore spitalore dhe qendrave rehabilituese.
Bazuar në Neni 24 të Udhëzim Administrativ nr. 03/2025 pika 3 – Shërbimet shëndetësore për Spitalin Special janë:
3.1.Veprimtaritë themelore shëndetësore e spitalit special;
3.2.Kabineti për diagnostikim radioimazherik;
3.3.Njësinë e kujdesit intensiv për spitalet me degë operative;
3.4.Laboratori hematologjik dhe biokimik, mikrobiologjik*, patologjik* dhe citologjik*;
3.5.Barnatorja;
3.6.Sterilizimi
Shërbime e lartcekura janë obligative për licencimin dhe funksionimin e Institucionit shëndetësor Spital special dhe përveç tyre Spitali special mund ti licencoj një (1) deri në katër (4) shërbime të pëcaktuar me ketë udhëzim administrativ
Spitali Special “FATI IM” është i licencuar me tre (3) shërbime:
Shërbimi i Gjinekologjisë me Obstetrikë;
Shërbimi i Kirurgjisë dhe
Shërbimi i urologjisë.
Nuk qendron fakti që ky Institucion shëndetësor është licencuar me gjashtë (6) veprimtari sipas pretendimeve por me tre (3), shërbimet nga pika 3 e Nenit 24 janë obligative për një institucion dhe pa të cilat nuk mund të funksionoj.
Edhe pse në përgjigjen e Ministrisë së Shëndetësisë thuhet se spitali special “Fati Im” nuk është licencuar në gjashtë (6) veprime, por vetëm në tri (3), në vendimin e Bordit për Licencimin e Institucioneve Privatë Shëndetësore thuhet se ky spital ka gjashtë (6) veprimtari.
“Institucioni Shëndetësor ka 6 (gjashtë) veprimtari shëndetësore: 1) Shërbimi i anesteziologjisë, reanimacionit kujdesit intenziv; 2) Shërbimi i Kirurgjisë; 3) Kabinetin për diagnostifim radiomazherik; 4) Shërbimi i Urologjisë; 5) Laboratori Biokimik-Hernatologjik; 6) Shërbimi i Gjinekologjisë me Obstetrikë.”, thuhet në vendimin e Bordit me rastin e licencimit të spitalit “Fati Im”.
Megjithatë, asnjë nen në Udhëzimin Administrativ nr. 03/2025 nuk e specifikon që përveç shërbimeve obligative për licencimin , spitali special mund të ketë edhe deri në katër (4) të tjera. (UDHËZIMI).
Veriu.info ka tentuar të kontaktoj sot me inspektoren që e ka hartuar raportimin, por deri në publikimin e artikullit nuk kemi arritur.
