Kryetari i Komunës së Mitrovicës, Faton Peci, ka bërë një reagim publik në lidhje me konkursin e shpallur për kryeshef ekzekutiv të KRM “Uniteti” nga Bordi i kësaj ndërmarrje, duke thënë se nuk do të lejoj që Komuna e Skenderajt me vetëm 10% të aksioneve në kompani të zgjedh drejtuesin ekzekutiv të saj.
Ai është zotuar se do të ndërmerr veprime ligjore dhe administrative për të pamundësuar një përpjekje të tillë nga Komuna e Skenderajt që udhëhiqet nga kryetari Sami Lushtaku, raporton Veriu.info.
Ndryshe, sot Faton Peci përmes Komitetit për Politikë dhe Financa ka futur në rend dite për seancën e ardhshme të Kuvendit Komunal formimin e Komisionit Komunal të Aksionarëve të KRM “Uniteti”, i cili pas formimit përmes përzgjedhjes së anëtarëve të Bordit pritet të bëjë përpjekje të frenoj përzgjedhjen e kryeshefit të shpallur nga Bordi që është zgjedhur mandatin e kaluar qeverisës.
Postimi i Faton Peci:
Reagim publik!
Të dashur qytetarë,
- Nuk lejojmë që Komuna e Skenderajt, me vetëm 10% të aksioneve në ndërmarrjen rajonale të pastrimit KRM “Uniteti” të na zgjedhë se kush do të jetë Kryeshefi Ekzekutiv që do të përkujdeset për Mitrovicën.
- Nuk mundet dhe është e turpshme përpjekja e Komunës së Vushtrrisë, e cila ka hequr dorë nga kjo ndërmarrje dhe ka krijuar kompaninë e re të saj komunale, të vendosë se kush do të jetë Kryeshefi Ekzekutiv në ndërmarrjen komunale të Mitrovicës. Nuk i kanë besuar shërbimin, por dëshirojnë të na zgjedhin Kryeshefin.
- Gjatë javëve/muajit që lamë pas, kemi adresuar çështjen e pastërtisë në qytet duke subvencionuar ndërmarrjen rajonale KRM “Uniteti”, për një qytet më të pastër.
- Kjo ndërmarrje është në gjendje të mjerueshme financiare dhe menaxheriale dhe këtij mjerimi po i vjen fundi. Ndërsa përpjekja e bordit të vjetër është të mbajë gjallë këtë mjerim përmes imponimit ndaj aksionarit kryesor, që është Komuna e Mitrovicës me 61.4% të vlerës së aksioneve të ndërmarrjes, për zgjedhjen e një kryeshefi të ri.
- JO, NUK DO TA LEJOJMË. Do të ndërmarrim të gjitha veprimet ligjore dhe administrative që një gjë e tillë të pamundësohet.
P.S Në foto po pasqyrojmë disa nga angazhimet tona për një qytet sa më të pastër.
