Qytetarët e Kosovës po vazhdojnë të përballen me çmime të larta të konsumit. Çdo ditë pothuajse vërejnë ngritje të çmimeve e shqetësimi vetëm sa shkon e shtohet.
Kostoja e lartë e produkteve bazike sipas qytetarëve ka ndikuar drejtpërdrejt në jetën e përditshme të tyre.
Madje ata thonë se çmimet në Kosovës janë të ngjashme me vendet e Perëndimit.
“Në Francë diferenca ish shumë më e vogël me këto çfarë standardi e kanë me këta. Çmimet tona gati njëjtë, madje disa më ma shtrenjtë”, tha një nga qytetarët që foli për RTK-në.
Një tjetër qytetar tha se për dallim nga standardi e nga pagat, çmimet çdo herë ngritën.
Pikërisht lidhur me çmimet e larta nëpër marketet e Kosovës, Iniciativa Qytetare “Kosova Bojkoton” kishte bërë thirrje që të bojkotohen të gjithë marketet ditën e shtunë.
Xhavit Kastrati, thotë se kjo po bëhet si shenjë pakënaqësie ndaj rritjes së përditshme të kostos së jetesës.
“Thirrja është më se e domosdoshme dhe do të ndikojë sado pak për t’i vetëdijesuar qytetarët që të na bashkëngjiten në bojktot dhe është një mënyrë ne si qytetarë të ngritemi si pakënaqësi”, tha ai.
Ngritja e çmimeve, sipas kryetarit të Shoqatës “Konsumatori”, po ndodh për disa arsye.
“Faktori kryesor që ndikon në çmime është fakti se në mbi 90 për qind të nevojave tona importojmë dhe së bashku me importet ne importojmë edhe inflacion”, tha Selatin Kaçaniku, kryetar i Shoqatës “Konsumatori”.
Ai tha se lojërat me çmime ndodhin edhe për shkak se konsumatori është plotësisht i pambështetur.
