Negociatat për programin bërthamor të Iranit do të jenë “shumë teknike” dhe mund të zgjasin me muaj, tha të martën Sekretari amerikan i Shtetit, Marco Rubio, raporton CNN.
Diplomati më i lartë amerikan tha se një fazë e tillë do të varej nga rihapja e Ngushticës së Hormuzit nga Irani.
“Faza e dytë është që ata duhet të angazhohen për negociata shumë specifike mbi… fatin e uraniumit shumë të pasuruar që ende ndodhet i varrosur thellë diku në një mal”, i tha Rubio Komitetit të Senatit për Marrëdhëniet me Jashtë. “Ata duhet të bien dakord për negociimin e kufizimeve të rënda dhe afatgjata, dhe/ose anulimin e aktivitetit të pasurimit në vendin e tyre”.
“Natyrisht, këto janë çështje shumë teknike, kështu që nuk mendoj se mund të zgjidhen brenda pesë ditësh. Kjo do të kërkonte që një ekip ekspertësh të takohej gjatë një periudhe 30, 60 ose 90-ditore dhe të përcaktonte detajet, por ata duhet të angazhohen për gatishmërinë e tyre për ta bërë këtë”, tha Rubio.
Ai tha se fillimisht Irani duhet të njoftojë se ngushtica është e hapur, pa tarifa kalimi, dhe se do t’i largojë minat dhe nuk do të qëllojë mbi anijet. Shtetet e Bashkuara nuk i kanë ofruar Iranit lehtësim të sanksioneve në këmbim të hapjes së ngushticës, tha Rubio, duke theksuar se heqja e sanksioneve do të varet nga përmbushja e kushteve.
