Mbështetja e NATO-s për Ukrainën mbetet e qëndrueshme dhe vazhdon të rritet, ka thënë Sekretari i Përgjithshëm i Aleancës, Mark Rutte, të premten gjatë një vizite në Kiev.
Pas takimit me presidentin ukrainas, Volodymyr Zelensky, Rutte deklaroi se ekzistojnë plane të tjera për të siguruar fonde nga NATO për të garantuar “një rrjedhë thelbësore të armëve amerikane në Ukrainë”.
Ai gjithashtu u ndal te takimi shumëpalësh i së hënës në Shtëpinë e Bardhë, duke cituar se presidenti i SHBA-së, Donald Trump, e bëri të qartë se “Shtetet e Bashkuara do të përfshihen vërtet në ofrimin e garancive të sigurisë për Ukrainën”.
“Tanë po punojmë së bashku – Ukraina, evropianët, Shtetet e Bashkuara – për t’u siguruar që këto garanci sigurie janë të një niveli të tillë që Vladimir Vladimirovich Putin, nuk do të përpiqet kurrë ta sulmojë përsëri Ukrainën”, tha Rutte në konferencën për shtyp.
Ai shtoi se marrëveshja e garancive të sigurisë do të përbëhet nga dy shtresa: forcimi i ushtrisë së Ukrainës dhe angazhimet nga SHBA-të dhe Evropa për të penguar çdo agresion të ardhshëm nga Rusia.
Sipas Rutte, diskutimet për vendosjen e trupave të huaja në Ukrainë si pjesë e garancive janë duke vazhduar, por “është shumë herët për të thënë se cili do të jetë rezultati”.
Ndërsa presidenti Zelensky theksoi se “Ukraina ka nevojë për garanci sigurie në mënyrë që ne, fëmijët dhe nipërit tanë të jemi të sigurt se Rusia nuk do të na sulmojë. Këto janë garanci sigurie kundër një agresori”.
