Ukraina ka sulmuar një stacion të rëndësishëm pompimi në rajonin Bryansk të Rusisë, duke ndërprerë furnizimet me naftë për Hungarinë dhe Sllovakinë, dy vendet e vetme të BE-së që ende marrin naftë nga Rusia.
Komandanti i Forcave të Sistemeve pa Pilot të Ukrainës, Robert Brovdi, konfirmoi sulmin ndaj stacionit Unecha, pjesë e naftësjellësit “Druzhba”. Zyrtarët rusë thanë se u përdorën raketa Himars dhe dronë në një sulm të kombinuar.
Qeveritë e Hungarisë dhe Sllovakisë i dërguan një letër Komisionit Europian, duke paralajmëruar se furnizimet mund të mbeten të pezulluara për të paktën pesë ditë. Ministrat e Jashtëm Péter Szijjártó dhe Juraj Blanár theksuan se “pa këtë tubacion, furnizimi i sigurt i vendeve tona është i pamundur”.
Budapesti reagoi me ashpërsi, duke e quajtur këtë sulm të tretin në një periudhë të shkurtër.
“Ky është një tjetër sulm ndaj sigurisë energjetike të vendit tonë, një përpjekje për të na futur në luftë”, tha ministri i Jashtëm Szijjártó. Kryeministri Viktor Orbán shtoi në një postim: “Hungaria ndihmon Ukrainën me energji elektrike dhe karburant, ndërsa ata bombardojnë tubacionin që na furnizon.”
Më pas, partia Fidesz publikoi edhe një mesazh me shkrim dore të presidentit amerikan Donald Trump, ku thuhej: “Viktor, nuk më pëlqen ta dëgjoj këtë, jam shumë i zemëruar. Thuaji edhe Sllovakisë. Ti je miku im i madh, Donaldi”.
Ndërkohë që 25 shtetet e tjera të BE-së kanë ndalur blerjen e naftës ruse pas pushtimit të plotë të Ukrainës në vitin 2022, Hungaria dhe Sllovakia vazhdojnë të varen nga “Druzhba”. BE-ja synon ta heqë plotësisht varësinë nga energjia ruse deri në fund të vitit 2027, por Budapesti dhe Bratislava e kundërshtojnë këtë plan.
Sulmi i fundit erdhi mes përpjekjeve të presidentit Trump për të ndërmjetësuar një marrëveshje paqeje, ndërkohë që lufta, pas tre vitesh e gjysmë, vijon me intensitet. Rusia ndërmori këtë javë një nga sulmet më të rënda pranë kufirit të Ukrainës me BE-në, ndërsa Kievi ka goditur vazhdimisht rafineritë ruse, duke rritur çmimet e karburantit në Moskë në nivele rekord.
Naftësjellësi sovjetik “Druzhba” kalon përmes Bjellorusisë dhe Ukrainës dhe furnizon me naftë Hungarinë, Sllovakinë e Gjermaninë. Furnizimet nga Kazakistani drejt Gjermanisë nuk u prekën nga sulmi.
