Sejdiu përmes një postimi në Facebook tha se shumë vende ‘zhbëhen nga grusht shteti, lufta, borxhi, pushtimi apo katastrofa’, por sipas tij ‘Kosova rrezikon të zhbëhet ndryshe’.
“Ka vende që zhbëhen me grusht shteti. Ka vende që zhbëhen me luftë. Ka vende që zhbëhen nga borxhi, nga pushtimi, nga një katastrofë që hyn në histori me datë, orë dhe fotografi.Kosova rrezikon të zhbëhet ndryshe. Kosova është vend politikisht hiperaktiv, kështu së paku duket në sipërfaqe. Televizionet plot debate. Portalet plot “politikë”. Zgjedhje, sondazhe, akuza, reagime, kundërreagime, statuse, video, brohoritje”, ka shkruar ai në Facebook.
Sipas Sejdiut, kriza në vend nuk është aksidentale, por metodë qeverisjeje.
Ai tha se kriza e vërtetë kërkon zgjidhje, kurse kriza e përhershme kërkon vetëm menaxhim emocional.
“Në Kosovë, kriza nuk është aksident. Është bërë sistem. Është bërë metodë qeverisjeje. Është bërë mënyra se si ky pushtet tash e 6 vite e mban shoqërinë të ngarkuar, të nervozuar, të lodhur, të ndarë dhe, në fund, me shpresë të dorëzuar. Një krizë e vërtetë kërkon zgjidhje. Një krizë e përhershme kërkon vetëm menaxhim emocional. Këtu qëndron dallimi mes shtetit dhe spektaklit”, shkroi Sejdiu në Facebook.
