Raportet mes AAK-së dhe Nismës janë rrënuar pothuajse plotësisht.
Dy partnerët e koalicionit në zgjedhjet parlamentare të 14 shkurtit kanë filluar një seri të re të akuzave ndaj njëri-tjetrit, disa muaj pas prishjes zyrtare të raporteve mes tyre.
Nënkryetari i Aleancës për Ardhmërinë e Kosovës, Daut Haradinaj, tha të mërkurën se nuk do të dëshironte më kurrë të ndodhej në një listë zgjedhore me Fatmir Limajn, liderin e Nismës Socialdemokrate.
“Asnjë problem nuk e kemi pasur, hatërmbetjet ose si me i quajtë ka qenë pse nuk ka komuniku me neve para se me marrë një drejtim tjetër ku shkojë te Kurti”.
“Nuk kisha pas qef me qenë edhe në listë ku është Fatmir Limaj në atë listë”, tha Haradinaj në emisionin Pressing të T7.
Një kundërpërgjigje e menjëhershme erdhi nga Nisma Socialdemokrate.
Anëtari i Kryesisë së Nismës, ish-ministri i Tregtisë, Endrit Shala e ‘goditi’ Haradinajn për votat e AAK-së lidhur me votimin e kryetarit të Kuvendit të Kosovës, Dimal Basha.
Ai, në një postim në Facebook të mërkurën në mbrëmje, u shpreh se për asnjë çmim s’do donte të ishte në një listë zgjedhore me “ata që kanë votu me dy duar Dimal Bashën”.
“As unë, për asnjë çmim, s’kisha dashtë me pas emrin në listë me ata që kanë votu me dy duar Dimal Bashën”, shkroi Shala në postim.
