Presidenti amerikan Donald Trump e ka cilësuar si “madhështore” marrëveshjen e re të sigurisë me Danimarkën dhe Grenlandën, e cila synon forcimin e pranisë dhe sigurisë së Shteteve të Bashkuara në Arktik.
Duke folur para ceremonisë së nënshkrimit në kuadër të Asamblesë së Përgjithshme të Kombeve të Bashkuara në New York, Trump tha se marrëveshja ishte “e gjatë në përgatitje”, shkruan Insajderi.
“Ky është një zhvillim i jashtëzakonshëm për Evropën dhe për Shtetet e Bashkuara”, tha Trump.
Marrëveshja vjen pas muajsh tensionesh mes Uashingtonit dhe Kopenhagës, pasi Trump kishte kërkuar që SHBA-ja të merrte kontrollin e Grenlandës dhe kishte refuzuar të përjashtonte përdorimin e forcës për ta siguruar atë.
Në ceremoninë e nënshkrimit mori pjesë edhe kryeministrja daneze Mette Frederiksen, e cila e vlerësoi marrëveshjen si një hap drejt forcimit të bashkëpunimit të sigurisë.
Frederiksen tha se Shtetet e Bashkuara janë “një aleat tek i cili gjithmonë kemi qenë në gjendje të mbështetemi”.
“Sot po nënshkruajmë një marrëveshje edhe më të madhe dhe më të mirë, një marrëveshje që mund të zgjasë përgjithmonë”, tha ajo.
Sipas saj, marrëveshja do të forcojë sigurinë dhe parandalimin e përbashkët, duke dërguar një mesazh të qartë ndaj kundërshtarëve.
“Po forcojmë sigurinë tonë të përbashkët, po rrisim parandalimin tonë të përbashkët, duke u treguar kundërshtarëve tanë se kush jemi dhe po e bëjmë këtë së bashku”, deklaroi Frederiksen.
Ajo shtoi se marrëveshja synon të sigurojë që asnjë “kundërshtar” të mos fitojë kontroll apo ndikim të rëndësishëm në Grenlandë, ndërsa prania e aleatëve në Arktik do të rritet.
