Pasi që pjesët e shesheve dhe trotuareve në Mitrovicë janë mbushur me mbeturina, si pasojë e mos-vazhdimit të kontratës nga komuna me “Unitetin” për kryerjen e këtij shërbimi, ka reaguar edhe shefi i sektorit të mbeturinave në Drejtorinë e Mjedisit në Komunën e Mitrovicës, Irfan Peci.
Ai e ka pranuar publikisht se kontrata për larje dhe fshirje të rrugëve mes Komunës dhe “Unitetit” ka skaduar, duke drejtuar gishtin kah Drejtoria për Shërbime Publike për të cilën ka thënë se është përgjegjëse për këtë dikaster të menaxhimit të mbeturinave.
Shefi Peci ka sqaruar se kontrata për shërbimet primare që hyn në domenin e Drejtorisë së Mjedisit është aktive me “Unitetin” për të gjitha fshatrat dhe zonat urbane, dhe se këto shërbime po realizohen sipas orareve dhe planit operativ.
Sqarim nga Irfan Peci:
Kontrata me UNITET-in për disa shërbime shtesë si larja dhe fshirja e rrugëve, pastrimi i shesheve dhe deponive ilegale ka përfunduar. Kjo kontratë, në kuadër të Drejtorisë së Shërbimeve Publike, vazhdimi i saj varet nga procedurat e prokurimit.
Qytetaret të kenë kujdes mos te hedhin qese dhe sasi të mëdha të mbeturinave në këto shporta rrugore apo nëper sheshe sepse ato shporta janë të parapara për mbeturina të vogla “gjepi” e jo qese me mbeturina sepse për atë janë kontenjeret metalikë.
Ndërkohë, kontrata për shërbimet primare në kuadër të Drejtorisë së Mjedisit (grumbullimi, transportimi dhe deponimi i mbeturinave për amvisëri, biznese, institucione dhe sherbime të veçanta) është aktive në të gjitha fshatrat dhe zonat urbane. Këto shërbime po realizohen sipas orareve dhe planit operativ.
Prandaj, ftojmë qytetarët të respektojnë oraret dhe të mos i vendosin mbeturinat jashtë kontejnerëve. Respektimi i rregullave ndihmon drejtpërdrejt në mbajtjen e qytetit të pastër.
