Administrata e presidentit Donald Trump ka larguar mbi 1 mijë punonjës të Departamentit të Shtetit në kuadër të ristrukturimit të krahut federal të punës.
Sipas dokumenteve të siguruara nga mediat amerikane, 1.107 punonjës civilë dhe 246 anëtarë të shërbimit të huaj janë shkarkuar kundër vullnetit të tyre, ndërsa më herët gjatë vitit rreth 1.500 të tjerë u larguan me vetëdije përmes një skeme riorganizimi.
Largimet kanë goditur veçanërisht Byronë për Popullsinë, Refugjatët dhe Emigracionin, si dhe zyrën që koordinonte zhvendosjen e afganëve – një pjesë jetike për sistemimin e refugjatëve në Shtetet e Bashkuara.
Pamjet e publikuara në rrjetet sociale tregojnë punonjësit duke u larguar nga ndërtesa me sendet personale në duar, ndërsa kolegët e tyre i përqafojnë e i duartrokasin në korridore.
Jashtë ndërtesës, protestuesit shfaqen me pankarta që shkruanin “Faleminderit diplomatëve të Amerikës” dhe “Ne meritojmë më mirë”.
Kritikët kanë paralajmëruar se ky shkarkim masiv do të ndikojë negativisht në kapacitetin e Departamentit të Shtetit për të ndjekur me efikasitet politikën e jashtme të SHBA-së.
