Ushtria e Shqipërisë do të pajiset me automjetet e para të blinduara “LMV2”, të prodhuara nga “Iveco Defence Vehicles”, divizioni ushtarak i kompanisë italiane “Iveco”, e cila njoftoi lajmin përmes rrjeteve sociale.
“Një moment historik për LMV2: Forcat e Armatosura të Shqipërisë do të pajisen me automjetet tona”, thuhet në njoftimin e kompanisë.
Sipas komunikatës, blerja do të financohet nga Bashkimi Evropian përmes Fondit për Paqen, ndërsa zbatimin do ta kryejë Agjencia Italiane e Industrisë së Mbrojtjes.
Nuk janë dhënë detaje për shumën totale apo numrin e automjeteve që do të modernizojnë Ushtrinë e Shqipërisë, por modeli “LMV2” është gjenerata më e re e një serie të suksesshme, duke ofruar mbrojtje të avancuar balistike dhe kundër minave. Automjetet janë të pajisura me motor me 220 kuajfuqi dhe marsh automatik me tetë shpejtësi, si dhe janë të përshtatshme për terrene të vështira.
“LMV2” ka qenë i testuar në misione ndërkombëtare, përfshirë Afganistanin, dhe përdoret nga ushtritë e disa shteteve të fuqishme, përfshirë Mbretërinë e Bashkuar, Italinë dhe Norvegjinë.
Në rajon, automjete të ngjashme janë në përdorim edhe nga Ushtria e Maqedonisë së Veriut dhe ajo e Malit të Zi.
