Analisti politik, Agon Maliqi, ka dhënë një alarm të fortë sa i përket pasojave diplomatike dhe ushtarake që e presin Kosovën nëse refuzohet projekti strategjik për gazin amerikan.
Sipas Maliqit, Kosova rrezikon të mbetet prapa të gjitha trendeve ekonomike dhe politike në rajon, duke humbur mbështetjen jetike të Uashingtonit në një moment kritik të konsolidimit të shtetësisë së saj në arenën ndërkombëtare.
Maliqi ka tërhequr vërejtjen se marrëdhënia me SHBA-në nuk mund të banalizohet me idenë se “nuk ka ndodhur asgjë” nga refuzimet e deritanishme.
“Ndodh që Kosova si në shumë fusha të tjera mbetet mbrapa. Pra, mbetet mbrapa e të gjitha trendeve ekonomike dhe politike. Nuk do ta ketë le të themi mbështetjen politike të nevojshme dhe ne kemi nevojë për mbështetjen diplomatike të SHBA-ve për shumë çështje në arenën ndërkombëtare sepse akoma e kemi të pazgjidhur një pjesë të konsolidimit të shtetësisë në arenën ndërkombëtare do të mbetet… rrezikon pra edhe pjesën e mbështetjes për FSK-në, pra kur nuk je partner strategjik në fusha që janë strategjike për SHBA-të nuk mund të presim që SHBA-të të jenë mbështetës i atyre pikave që janë strategjike për Kosovën. Pra kjo çështje nuk mund të banalizohet tani se ekziston një pjesë e opinionit publik që thotë po ne i kemi refuzuar shumë gjëra të tjera dhe nuk ka ndodhur asgjë”, tha Maliqi për “Betimi për Drejtësi“.
Ai thotë se ndonëse SHBA-ja nuk do ta çnjohë Kosovën, vendi rrezikon të mbetet një “shtet i cunguar”, pa kapacitete energjetike dhe pa mbështetjen ushtarake për Forcën e Sigurisë së Kosovës (FSK). Ai ka përmendur si shembull faktin se si mbarë rajoni– përfshirë edhe Serbinë përmes projekteve të reja me gjigantin amerikan “Bechtel”– po bëhet pjesë e arkitekturës së re energjetike të SHBA-së, ndërsa Kosova po mbetet e izoluar.
“Është e vërtetë, SHBA-të nuk do ta çnjohin Kosovën, SHBA-të nuk do ta.. domethënë akoma Kosova mbetet shtet, mirëpo Kosova mbetet shtet i cunguar, pa kapacitete energjetike dhe pa mbështetjen e nevojshme politike dhe ushtarake të SHBA-ve në një moment kur ka jashtëzakonisht shumë nevojë për të dhe në një moment kur i gjithë rajoni po bëhet pjesë e kësaj arkitekture, përfshi edhe Serbinë dhe jo vetëm me gaz, por edhe me kapacitete të tjera energjetike. Ne kemi këtë javë një projekt të SHBA-ve me Bechtel-in për ndërtimin e hidrocentralit në Serbi. Pra, i gjithë rajoni po bëhet pjesë e kësaj arkitekturë të energjisë. Vetëm ne po mbetemi jashtë dhe kjo na heq domethënë jo vetëm mundësitë për domethënë për zhvillim ekonomik sepse energjia është thelb i kësaj. Por, edhe na dobëson nga perspektiva e marrëdhënies, nivelit të marrëdhënies, cilësisë së marrëdhënies me SHBA-të në temat e sigurisë dhe ato diplomatike”, shtoi Maliqi.
Për më shumë, ndiqeni emisionin “Refuzimi i gazit amerikan a cenon sigurinë kombëtare dhe raportet strategjike me ShBA-në?”, i cili transmetohet në T7 dhe platformat online të “Betimi për Drejtësi”.
