Në Ministrinë e Shëndetësisë (MSH), që udhëhiqet nga ministri në detyrë, Arben Vitia, ka ndodhur një skandal me veturat e ndihmës së shpejtë, ose që ndryshe quhen autoambulanca. Kjo ministri, në vitin 2025, kishte paguar plot 1 milion e 495 mijë e 800 euro për t’i blerë 20 autoambulanca, por pranoi furgonë të modifikuar nga Operatori Ekonomik (OE).Gjatë vitit 2025, MSH ishte furnizuar me 20 autoambulanca në vlerë totale 1,495,800 euro.
Për autoambulancat, të cilat ishin fillimisht furgonë e që më pas u modifikuan si vetura të ndihmës së shpejtë apo autoambulanca, që adresë kishin MSH-në, ka shkruar edhe Zyra Kombëtare e Auditorit.
ZKA ka shkruar se këto “autoambulanca” nuk i plotësonin disa nga specifikimet teknike dhe certifikimet e kërkuara për një autoambulancë, sipas standardeve përkatëse.
“Specifikat teknike përcaktonin autoambulancën si produkt të përfunduar, ndërsa operatori ekonomik kishte ofertuar automjete të tipit furgon, të cilat më pas ishin modifikuar në autoambulanca. Megjithatë, automjetet e pranuara nuk posedonin certifikatat e kërkuara sipas specifikimeve teknike.”
Krejt çfarë kanë këto autoambulanca të modifikuara, është aprovimi i lëshuar nga Qendra e Automjeteve të Kosovës. Pra, komisioni i vlerësimit i ka pranuar si të tilla, pa kryer verifikime shtesë për përputhshmërinë me standardet përkatëse, ku kërkohet që automjeti që në këtë rast autoambulancës, sistemet dhe pajisjet e tij të jenë në pajtim me standardin EN 1789:2020, si dhe të kenë deklaratën e konformitetit CE.
Komisioni vlerësues në MSH kishte konsideruar të mjaftueshëm vetëm aprovimin e lëshuar nga Qendra e Automjeteve të Kosovës, pa kryer verifikime shtesë për përputhshmërinë me standardet përkatëse.
Këto autoambulanca MSH i kishte dërguar në QKMF-të e komunave.
Ndërsa, siç raporton Gazeta Nacionale, stafi shëndetësor, në rast të ndonjë emergjence, përballet me probleme gjatë përdorimit të këtyre autoambulancave, ose më mirë t’i quajmë furgonë të modifikuar, pasi kanë defekte të theksuara, siç është mosfunksionimi i sistemit të oksigjenit, që është ndër elementet kryesore që duhet ta ketë secila autoambulancë, pastaj shtretërit e papërshtatshëm për pacientët, e deri te djegia e sistemit.
Siç raportohet, kjo autoambulancë e modifikuar (furgon Opel i modifikuar si ambulancë) nuk përdoret në 90 për qind të rasteve, pasi ka probleme të theksuara për trajtimin e pacientëve në raste emergjente, duke filluar nga instalimi i sistemit, barela apo shtrati ku vendoset pacienti, problemet me oksigjenin etj., pra është pothuajse jofunksionale.
Në rastin e fotos më lart, këmbët e shtratit nuk funksionojnë si duhet dhe pacienti nuk mund të vendoset mbi të.
Ndërsa, në këtë foto, shihet pajisja për oksigjen, e cila nuk funksionon, por që stafi ka improvizuar në mënyra të tjera në raste emergjente.
Një nga autoambulancat e modifikuara, e cila po qëndron e parkuar në njërën nga QKMF-të e Kosovësm dhe që nuk përdoret pothuajse asnjëher për shkak të defekteve.
Duhet thesohet se nga ekzaminimi i automjetit në Qendrën Urgjente në Prishtinë u evidentuan këto mospërputhje:
Barela e Ambulancës me rrota në katalog ishte ofruar me dimensionet minimale 1930x600x210mm, ndërsa sipas matjeve të pranuara nga MSH është 1750mm. Gjatësia e ndarjes së pacientit ishte kërkuar në specifika prej minimum 3100 mm, ndërsa ishte 2800 mm; Stema, shënjimet dhe skema e ngjyrave nuk përmbushnin standardet e cilësisë dhe kishin filluar të dëmtohen para vënies në funksion; Kërkohej vizatimet 2D dhe 3D për planimetrinë e brendshme, ndërsa ndarja e brendshme ishte e papërfunduar dhe pa shënjime funksionale.
Kështu fillimisht është dukur autoambulanca e modifikuar, një furgon i tipit ‘Opel Movano’.
Ministri i Shëndetësisë, Arben Vitia, i cili ende vazhdon të jetë në krye të kësaj ministrie, me pompozitet kishte prezantuar blerjen e këtyre “autoambulancave” dhe mënyrën se si po i ndihmonte komunat duke ua shpërndarë atyre.
Në dosjen e tenderit nga MSH dhe në njoftimin për kontratë, specifikat teknike përcaktonin autoambulancën si produkt të përfunduar, ndërsa operatori ekonomik kishte ofertuar automjete të tipit furgon, të cilat më pas ishin modifikuar në autoambulanca.
Në njoftimin e MSH, për dhëni të kontratës, ka titullin: “Furnizim me Autoambulanca BLS për nevoja te QKMF-ve ne kuadër te KPSH”.
Pra, autoambulancat, ose furgonët e modifikuar, nuk ishin në përputhje me specifikimet teknike dhe kushtet e kontratës, ndërsa MSh i ka pranuar si të tilla, edhe pse Operatori Ekonomik nuk iu ka përmbajtur kontratës.
