Kompania e derivateve “Ex Fis”, e njohur edhe si donatore e Lëvizjes Vetëvendosje, është rikthyer në vëmendje pasi Autoriteti i Aviacionit Civil të Kosovës (CAA) i ka miratuar të drejtën për furnizimin e aeroplanëve me kerozinë në Aeroportin Ndërkombëtar të Prishtinës për një periudhë shtatëvjeçare.
Kjo kompani ndër vite ka përfituar kontrata të shumta nga institucionet publike, veçanërisht nga Korporata Energjetike e Kosovës (KEK). Vetëm gjatë gjashtëmujorit të fundit, KEK-u i ka dhënë “Ex Fis” dy kontrata për furnizim me mazut përmes procedurës me negocim.
Gazeta Insajderi ka raportuar me 19 shkurt, se njëra nga këto kontrata njëburimore për “Furnizim me mazut” kap vlerën 260 mijë euro.
Ndërsa një tjetër kontratë e dhënë më 3 dhjetor 2025 arrin vlerën 264 mijë euro.
Po ashtu, në korrik të vitit 2025, KEK-u kishte nënshkruar një kontratë tjetër me këtë kompani në vlerë prej 592 mijë eurosh për furnizim me Fuel Oil 1.0%.
Lista e tenderëve
Sipas të dhënave në platformën e-prokurim KEK ka lidhur disa kontrata me “Ex Fis”.
Pesë prej tyre janë ende në realizim, ndërsa disa të tjera, përfshirë një tender rreth 2 milionë euro, një tjetër rreth 700 mijë euro dhe një rreth 500 mijë euro, tashmë kanë përfunduar.
Tenderi më i shtrenjtë që aktualisht është aktiv ka të bëjë me furnizimin me vaj për ngrohje – mazut, me vlerë afro 700 mijë euro.
Përveç KEK-ut, kontratë me këtë kompani ka lidhur edhe Ministria e Infrastrukturës, e cila në vitin 2023 i dha një tender për mirëmbajtje të rrugëve nacionale me vlerë rreth 100 mijë euro.
Në total që nga viti 2022 kompania “Ex Fis” ka përfituar mbi 6 milionë euro nga institucionet shtetërore gjatë qeverisjes së VV-së.
Ndërkohë, sipas dokumenteve të publikuara nga Front Online, Autoriteti i Aviacionit Civil i Kosovës ka miratuar që kompania EXFIS Sh.P.K të ofrojë shërbime furnizimi me kerozinë për aeroplanët në Aeroportin Ndërkombëtar të Prishtinës për periudhën 1 janar 2026 – 31 dhjetor 2032.
Lista e shërbimeve të aprovuara nga AAC për EXFIS janë: Organizimi dhe ekzekutimi i operimeve për mbushje dhe zbrazje të derivateve, duke përfshirë deponimin e derivateve dhe kontrollin e cilësisë dhe sasisë së derivateve.
Ministri i Infrastrukturës dhe Transportit, Dimal Basha, duke folur rreth rastit të kontratës në Aeroportin Ndërkombëtar të Prishtinës, tha se e çdo person që kapet duke keqpërdorur detyrën, do të përfundojë në burg.
“O vëlla e motër me pasë, kur kapet duke keqpërdorur, vendin e ka në burg. Ky është zotimi im dhe do të mundohem të punoj me zell”, tha ai në RTV Dukagjini.
Ex Fis donator i Vetëvendosjes
Kompania e derivateve Ex Fis, njihet në publik edhe si financuese e Lëvizjes Vetëvendosje, sa kjo e fundit ishte në opozitë.
“EX FIS”, figuronte me vlerën më të madhe të mallrave si donacion, duke ia dhuruar tashmë partisë në pushtet plot 9,534 euro përgjatë zgjedhjeve të vitit 2020.
Po ashtu, të dhënat e shpenzimeve të LVV-së për periudhën 2020-2023 dhe 2024, tregojnë se partia është furnizuar nga kjo kompani për derivatet e automjeteve të saj.
