Drejtoria për Hetimin e Krimeve Ekonomike dhe Korrupsionit e Policisë së Kosovë më 10 tetor 2024 kishte zhvilluar aksion në shumicën e pikave të rrjetit të laboratorëve dhe poliklinikave ‘Avicena KS’ në Kosovë, nën dyshimet për keqpërdorim të pozitës zyrtare, falsifikim të dokumenteve dhe ushtrim të kundërligjshëm të veprimtarisë mjekësore dhe farmaceutike. 19 lokacione u mbyllën, 5 rezultuan që s’janë aktive, ndërsa 9 të tjera do të vazhdojnë punën me masat e shqiptuara.
Për rastin ishte deklaruar edhe Prokurori i Prokurorisë Themeloren në Prishtinë në Departamentin për Krime të Rënda, Besnik Jakupi, ku tha se dyshojnë që certifikatat mjekësore për patentë shoferë janë lëshuar prej pikave që nuk kanë pasur licencë nga ky laborator.
“Po, me urdhëresë të gjykatës është. Unë e kam ba kërkesën, çertifikatat mjekësore për patentë shoferë janë lëshu prej pikave që nuk kanë pas licencë”, kishte thënë pas aksionit për “Betimi për Drejtësi” prokurori i rastit Besnik Jakupi.
Ndërsa, të nesermen në raportin 24 orësh të Policisë së Kosovës të kategoria e incidenteve kriminale ishte përmendur rasti i aksionit të bastisjeve në ‘Avicena KS’, ku thuhej: “KEQPËRDORIM I POZITËS ZYRTARE & FALSIFIKIM I DOKUMENTEVE & USHTRIM I KUNDËRLIGJSHËM I VEPRIMTARISË MJEKËSORE DHE FARMACEUTIKE- Prishtinë 2023-2024-NN. Me 10.10.2024 Drejtoria për Hetimin e Krimeve Ekonomike dhe Korrupsionit, kanë kontrolluar 36 lokacione të ndryshme me dyshime për veprat penale të lartë-cekura. Si prova materiale janë gjetur dhe sekuestruar: tri pistoleta, 6 copë armë të gjata, 598 copë fishekë të kalibrave të ndryshëm, një telefon, 2 shtëpiza kompjuteri, 7 DVR dhe dokumente të ndryshme. Lidhur me rastin janë intervistuar katër të dyshuar meshkuj kosovarë të cilët me vendim të prokurorit janë liruar, rasti në procedurë hetimore”.
Por duket se imazhin e dëmtuar të ‘Avicena KS’ pas këtij aksioni po përkujdeset një politikan që ta rregulloj. Fjala është për drejtorin e Drejtorisë së Shëndetësisë në Komunën e Mitrovicës, Fahri Shabani, i cili dje përmes një postimi në rrjetin social Facebook ka shkruar për një bashkëpunim që ka arritur me ‘Avicena KS’ për ‘huazimin’ e një radiologu të kësaj kompanie për nevojat e Qendrës Kryesore të Mjekësisë Familjare në Mitrovicë.
Drejtori Shabani që menaxhon drejtorinë e Shëndetësisë me qindra punëtorë e miliona euro rroga të dhëna brenda vitit, përmes këtij postimi publik ka bërë të duket që menaxhon një institucion skamnor dhe ka paraqitur këtë kompani që po hetohet për dallavere si kompani bamirëse që përkujdeset ‘falas’ për nevojat e pacientëve.
“Ditën e djeshme, 26 gra dhe vajza të Mitrovicës kanë kryer ultrazërin e gjirit falas në Kabinetin e Radiologjisë në QKMF falë marrëveshjes së bashkëpunimit në mes të Drejtorisë për Shëndetësi dhe kompanisë AvicenaKS , e cila ndër tjera përfshinë edhe ofrimin e shërbimeve të specialistit të radiologjisë ( nga ana e AvicenaKS) një herë në javë ( e premtë) për nevojat e Kabinetit të Radiologjisë së QKMf-së. Të gjitha gratë dhe vajzat e interesuara për shërbimin e ultrazërit të gjirit, caktimin e termineve duhet ta bëjnë në kabinetin e radiologjisë në QKMF çdo ditë pune prej orës 8.00 deri në 13.00”, ka shkruar në Facebook Fahri Shabani, drejtor i Drejtorisë së Shëndetësisë në Komunën e Mitrovicës.
(Veriu.info sot ka dërguar kërkesë për qasje në dokumente publike në Komunën e Mitrovicës për marrëveshjen e arritur me “Avicena KS”.)
