Për më shumë se një dekadë është raportuar se në shumë raste ka pasur keqpërdorime në Kosovë, më rastin e asfaltimit të rrugëve lokale, regjionale e autostradave, dyshime të cilat po vazhdojnë akoma, duke pasur parasysh çmimet shumë të larta në pozicione të caktuara brenda kontratave që lidhen mes institucioneve të Kosovës dhe operatorëve ekonomikë.
Në redaksinë e Veriu.info ka ardhur një raportim, i cili përmbanë edhe dokumente zyrtare, mbi të cilat hedhet dyshime se si për ndërtimin e rrugës “Lah Nimani” në Mitrovicë do të investohen mbi 890 mijë euro, anipse rruga është e gjatë vetëm 394 metra.
KËTU GJENI KONTRATËN: SHKARKO DOKUMENTIN
Veriu.info ka siguruar kontratën e komunës së Mitrovicës të lidhur me Grupin e operatorëve ekonomik: Bujar Shabani B.I., Kosova asfalt Sh.P.K., EL-BAU Sh.P.K., Urban O.P., e cila mbanë datën e nënshkrimit 24.11.2022 dhe përfundon pas dy vitesh, më saktësisht më datë 22.11.2024.
Edhe pse e gjatë më pak se 400 metra, më saktësisht 394.6 metra, shihet se rregullimi i rrugës “Lah Nimani” do t’i kushtojë jashtëzakonisht shumë komunës së Mitrovicës. Kjo pasi që me rastin e shpalljes së kontratës, komuna e Mitrovicës ka paraparë që ky projekt të kushtojë 600 mijë euro, ndërsa fituesi i tenderit ka ofertuar më çmim 892,453,40 euro, që i bie 48.74% mbi vlerën e parashikuar nga autoriteti kontraktues.
Anomalia, nëse mund ta quajmë në rastin më të butë, e që realisht është fryrja e dyshuar manipulative e çmimeve ka ndodhur në të paktën tri pozicione brenda kësaj kontrate. Më saktësisht te incizimi gjeodezik i këtij projekti që do të kushtojë 92,609.40 euro. Pra, sipas kontratës së nënshkruar për 394 metra gjatësi rrugore, komuna e Mitrovicës do të paguaj mbi 92 mijë euro, punë e cila mund të kryhet me aparatura të një zyreje modeste gjeodezike.
Veriu.info pas shikimit të kontratës ka parë (shiko dokumentin) se për shënim gjeodezik gjatë punëve paraprake janë paraparë të paguhen 15.389 euro.
Sikur të mos mjaftonte kjo matje gjeodezike, në kontratën e nënshkruar nga komuna e Mitrovicës dhe operatori ekonomik është paraparë që fiksimi i pikave kontrolluese gjeodezike për ndërtimin e kanalizimit fekal të kushtoj 39 mijë euro (shiko dokumentin).
Shpenzime marramendëse të matjeve gjeodezike për këtë rrugë më të shkurtër se 400 metra, nuk përfundojnë me kaq, pasi që ‘qershia mbi tortë’ parashihet edhe në një pozicion tjetër për matje gjeodezike, nga i cili është paraparë t’i paguhen operatorit ekonomik 38 mijë e 220 euro (shiko dokumentin), e që në përshkrim të tij shihet se është pozicion i njëjtë i emërtuar sikur pozicioni prej 39 mijë euro. Pra, komuna në bazë të kontratës, do të paguaj dy herë për pozicionin e fiksimit të pikave kontrolluese gjeodezike për ndërtimin e kanalizimit fekal në rrugën “Lah Nimani”
Veriu.info ka kontaktuar me disa zyre gjeodezike private, të cilat kanë pranuar të flasin por vetëm në kushte anonimiteti, ku kanë thënë se matja gjeodezike për 1 km rrugë kushton rreth 2 mijë euro. Duke pasur parasysh këtë, del dyshimi i bazuar se buxheti i komunës së Mitrovicës do të dëmtohet për rreth 90 mijë euro vetëm nga pozicionet e matjeve gjeodezike të parapara me këtë kontratë.
Nga pozicionet brenda kontratës shihet se matja gjeodezike kushton 39 euro për 1 metër gjatësi, përderisa 1 m2 asfalt (në të dy shtresat) do të kushtoj 35.90 euro (pozicioni 3.4 është 19.90 m2 dhe pozicioni 3.5 është 16. euro m2). Kjo tregon se më lirë do të kushtoj 1 m2 asfalt, se sa një metër e matje gjeozedike vetëm në njërin prej tre pozicioneve, pasi që kontrata parasheh se do të bëhet të paktën tri matje/fiksime gjeodezike, ku për secilën prej tyre do të paguhen nga 39 euro për 1 metër gjatësi të kësaj rruge.
Por dyshimet për çmimejashtëzakonisht të shtrenjta në këtë kontratë nuk përfundojnë me kaq, pasi që Veriu.info ka hulumtuar kontrata të nënshkruara nga institucionet publike për pozicionet ‘furnizim e punim i asfaltit 0-22mm’ dhe ‘shtresë e asfaltit’ 0-16mm, ku gazeta Veriu.info ka mësuar së mesatarisht çmimi i tregut sillet rreth 16.5 euro. Kjo do të thotë se buxheti i komunës në bazë të këtyre dy pozicioneve të kësaj kontrate do të dëmtohet për rreth 134 mijë euro.
Kush është Bujar Shabani?
Kontrata e lidhur mes komunës së Mitrovicës dhe tre operatorëve ekonomikë, del të jetë që dy nga katër operatorët ekonomikë janë në pronësi të biznesmenit Bujar Shabani, ndaj të cilit në vitin 2022 Prokuroria Themelore e Ferizajit kishte ngritur aktakuzë për mashtrim në tenderë publikë.
Prokuroria kishte kërkuar që biznesmeni Bujar Shabani të përjashtohet nga pjesëmarrja në tender publikë.
Ai dyshohet se ka mashtruar fillimisht në tenderin “Asfaltimi i rrugëve në fshatin Jezerc” në vlerë prej 5.2 milionë euro të cilin e ka fituar dhe në tenderin “Zgjerimi i rrugës së fshatit Bibaj, kyçja në autostradë Arbër Xhaferi”, gjatë procedurave të konkurimit, tender të cilin nuk e kishte fituar.
Detaje të aktakuzës kundër shokut multimilioner të Hysen Durmishit
Biznesmeni Shabani dyshohet se ka mashtruar inxhinierin Arben Vranovci që jeton në Norvegji, diplomën e të cilit e kishte përdorur për konkurime në tenderë, fillimisht pa marrëveshje kontraktuale e pastaj edhe me nënshkrim marrëveshje, gjë për të cilën inxhinieri nuk ishte kontaktuar asnjëherë. Inxhinieri Vranovci kur ka kuptuar diploma e tij po shfrytëzohet tinëz kishte denoncuar rastin në prokurori.
Por ky nuk është rasti i vetëm, pasi biznesmeni Shabani dyshohet se ka mashtruar edhe me gjeodeten Violeta Aliu Bislimi, licencën e së cilës e kishte përdorur jashtëligjshëm pasi kjo e fundit ishte punësuar në komunën e Ferizajit, dhe licenca është jovalide nëse personi punon në një institucion publik.
Biznesmeni Shabani njihet për lidhjet e afërta me zëvendësministrin aktual të Infrastrukturës, Hysen Durmishi, me të cilën është parë shpeshherë i shoqëruar. Vet ministri ka deklaruar se me Shabanin njihet që nga viti 2000.
