Zyra Ekzekutive e Prokurimit pranë Korporatës Energjetike të Kosovës (KEK sh.a.) më datë 4 shtator 2025 ka shpallur fituese kompaninë GRAMI sh.p.k. në një procedurë të negociuar për furnizim me Gëlqere të Hidratizuar, në vlerë prej 141 mijë euro (me TVSH).
Kontrata është dhënë pavarësisht se, në një procedurë të rregullt të zhvilluar më herët, e njëjta kompani ishte eliminuar për të njëjtin furnizim për shkak të prejardhjes së ndaluar të materialit nga Serbia, si dhe për shkelje të standardeve teknike.
Sipas dokumenteve zyrtare, kompania e shpërblyer kishte qenë më herët pjesë e një procedure të rregullt tenderimi për furnizim me gëlqere të hidratizuar, por ishte eliminuar nga OSHP, për shkak se kishte ofertuar materiale me origjinë nga Serbia, një praktikë e ndaluar me vendim të Qeverisë së Republikës së Kosovës.
Për më tepër, kjo kompani nuk kishte përmbushur kriteret teknike dhe dokumentacionin ligjor. Në vendimin e vet, paneli shqyrtues i OSHP-së kishte konstatuar se operatori kishte dorëzuar vetëm një raport testimi të vitit 2020 nga “Institut IMS AD Beograd”, që nuk përmbush kërkesat për certifikatë të vlefshme të cilësisë, sipas standardit të kërkuar EN 459-1 për produktin Ca(OH)₂.
Në të njëjtin vendim, OSHP kishte ritheksuar se autoritetet kontraktuese janë të detyruara të zbatojnë vendimet e Qeverisë, përfshirë edhe ndalimin e përdorimit të mallrave me origjinë nga Serbia në furnizimet publike. Megjithatë, insistimi i KEK për të vijuar me këtë kompani duket se është shpërblyer, pasi tashmë, sipas vendimit të datës 4 shtator 2025, e njëjta kompani është shpërblyer për furnizim me të njëjtin produkt – vetëm disa muaj më vonë – përmes një procedure të mbyllur negociuese, jashtë konkurrencës, për t’i dhënë pikërisht të njëjtës kompani një kontratë të re.
Sipas informacioneve të redaksisë, edhe në këtë procedurë janë shkelur në mënyrë flagrante të gjitha kushtet dhe kriteret teknike, megjithatë KEK ka kufizuar qasjen në dokumente për palët e interesuara, me arsyetimin se dokumentet janë konfidenciale.
KEK, që nga ardhja e Qeverisë Kurti, ka zhvilluar me qindra procedura prokurimi përmes negocimit të drejtpërdrejtë, duke eliminuar konkurrencën dhe transparencën në prokurim publik. Ligji për Prokurimin Publik (LPP) e lejon përdorimin e procedurës së negociuar vetëm në rrethana të kufizuara dhe të justifikuara qartë, megjithatë, ky kriter nuk është respektuar nga KEK dhe as institucionet tjera gjatë viteve të fundit.
Edhe më paradoksale është se për këtë furnizim ekziston një kontratë kornizë 36-mujore, e nënshkruar nga vet KEK në nëntor të vitit 2024, e cila për shkak të ankesave është aktualisht e pezulluar. Megjithatë, sipas ekspertëve, kjo nuk e justifikon ndjekjen e një procedure të mbyllur, jashtë konkurrencës dhe aq më pak me një operator të eliminuar paraprakisht.
