Sasi të mëdha të produkteve medicinale pa banderola të Republikës së Kosovës, si dhe barna me banderola të Maqedonisë, Shqipërisë dhe Serbisë, janë gjetur gjatë një inspektimi në barnatoren “Nigella Pharmacy” në Graçanicë, e cila është në pronësi të farmacistit Samir Toro.
Inspektimi është kryer nga Inspektorati Farmaceutik i Kosovës, në bashkëpunim me Njësinë për Hetimin e Krimeve Ekonomike të Policisë së Kosovës, regjioni i Prishtinës.
Sipas procesverbalit të inspektimit të siguruar nga Front Online, arsyeja e kontrollit në këtë barnatore ishte mbrojtja e shëndetit publik në Republikën e Kosovës.
Në dokumentin zyrtar thuhet se gjatë kontrollit janë gjetur produkte medicinale të paautorizuara për qarkullim në territorin e Kosovës.
“Me rastin e inspektimit janë marrë sasi të caktuara të produkteve medicinale të cilat janë të paautorizuara për qarkullim në territorin e Kosovës, të cilat ishin pa banderola, me banderola të Maqedonisë, Shqipërisë si dhe Serbisë. Produktet e gjetura janë regjistruar në listat e konfiskimit”, thuhet në procesverbalin e Inspektoratit Farmaceutik.
Por gjetjet nuk përfundojnë me kaq.
Sipas procesverbalit, gjatë kontrollit të hapësirës administrative të barnatores, inspektorët kanë hasur edhe në hapësira të modifikuara, të cilat dyshohet se janë përdorur për fshehjen dhe ruajtjen e produkteve medicinale të paautorizuara.
Në dokument thuhet se në pjesën administrative, konkretisht te fotelet, janë gjetur dy fioka të modifikuar, brenda të cilëve ishin të vendosura produkte medicinale që, sipas inspektoratit, nuk kishin autorizim për qarkullim në Kosovë.
Këto gjetje, sipas dokumenteve zyrtare, e kanë shtyrë trupën inspektuese që produktet e identifikuara t’i regjistrojë në lista konfiskimi, si prova të produkteve të dyshuara për qarkullim të paligjshëm.
Rasti merr peshë edhe më të madhe për faktin se kontrolli nuk është kryer vetëm nga inspektorët farmaceutikë, por edhe në prani të zyrtarëve të Policisë së Kosovës, përkatësisht njësisë që merret me hetimin e krimeve ekonomike.
Barnat pa banderola ose me banderola të shteteve të tjera, sipas praktikës institucionale, ngrenë dyshime serioze për mënyrën e hyrjes së tyre në treg, prejardhjen, cilësinë, zinxhirin e furnizimit dhe sigurinë e përdorimit nga qytetarët.
Për këtë çeshtje portali Front Online ka dërguar pyetje në barnatoren “Nigella Pharmacy”, por as pas disa ditë pritje nuk ka arritur të marrë përgjigjie nga ta.
Front Online do të vazhdojë të raportojë për këtë rast dhe për veprimet e mëtejshme të institucioneve përgjegjëse. / Front Online /
