Kompania “Ipko”, e cila ofron shërbime të telekomunikacionit në Kosovë, internet e telefoni mobile, që nga viti 2007, po u shkakton telashe klientëve të saj duke mos arritur t’i “furnizojë” me internet e duke i privuar nga thirrjet telefonike.
Shërbimet e dobëta janë duke vazhduar tash e sa kohë. Shumë përdorues, ditëve të fundit, janë ankuar për mungesë rrjeti 4G, dhe se pakot e internetit po u “përpihen” shumë shpejt.
Në IPKO e kanë fajësuar edhe ARKEP’in për këtë gjendje, duke thënë se duhet ta zgjerojnë brezin frekuencor.
Ndërsa, ARKEP thotë se operatorët i kanë konfirmuar këto ankesa të klientëve.
Pas problemeve të furnizimit me energji elektrike në Kosovë, kanë filluar problemet serioze edhe me shërbimet e telefonisë mobile.
Tash sa ditë, qytetarët e Kosovës po përballen më një mungesë të internetit në paisjet e tyre mobile. Probleme të mëdha, kanë edhe me thirrjet normale telefonike.
Ankesat e klientëve ndaj Telekomit të Kosovës dhe IPKO’s, dy kompanitë e vetme në Kosovë që i ofrojnë këto shërbime, janë në numrin më të madh prej që ekzistojnë këto kompani në treg.
Sipas burimeve të Express, mungesa e shërbimeve telefonike po ndodh shkaku i mungesës së rrymës në antenat që shpërndajnë internetin.
Nga IPKO e kanë pranuar se në disa zona ka probleme të tilla, duke thënë se kjo po ndodh shkaku i kufizimeve të shpeshta me energji elektrike.
Afrika Zyferi nga kjo kompani ka thënë se IPKO e ka adresuar këtë çështje që nga fillimi i operimit duke shtuar gjenerator të energjisë në shumicën e lokacioneve, mirëpo në disa zona s’kanë mundur, meqë ka pasur kundërshtime shkaku i zhurmës.
“Vetëm disa zona, ku teknikisht ka qenë e pamundur të shtohen ose ka pasur kundërshtime nga komuniteti për shkak të zhurmës, nuk kemi mundur të vendosim gjeneratorë. Megjithatë, në rastet e kufizimeve të energjisë elektrike, pavarësisht nga fakti që rrjeti ynë Fix mbështetet nga gjeneratori, shumica e klientëve tanë nuk janë të pajisur me rezervë të energjisë (siç janë UPS ose gjeneratorë), kështu që ata mbështeten në përdorimin e internetit të telefonisë mobile dhe krijojnë një trafik të rënduar në zonat e prekura. Për më tepër, kapaciteti i internetit të telefonisë mobile, është zgjeruar në kufirin maksimal që na lejon brezi frekuencor i ndarë nga ARKEP”, ka deklaruar ajo.
Nga IPKO kanë fajësuar pak edhe Autoritetin Rregullativ i Komunikimeve Elektronike dhe Postare (ARKEP), për mos zgjerimin e brezit frekuencor.
Sipas saj, zgjerimi i brezit frekuencor do mundësonte përmirësimin dhe fuqizimin e 4G dhe shërbim shumë më të mirë edhe me rrjet më të ngarkuar, si në rastet e kufizimeve të energjisë elektrike.
“Kështu, për të rritur më tej kapacitetin e internetit të telefonisë mobile dhe për të zbutur këtë problem, duhet të ndahet më shumë brez frekuencor nga ARKEP, i cili do të na mundësonte përmirësimin dhe fuqizimin e 4G dhe do të na mundësonte të ofrojmë shërbim shumë më të mirë edhe me rrjet më të ngarkuar, si në rastet e kufizimeve të energjisë elektrike. IPKO është e gatshme të investojë dhe përmirësojë shërbimet 4G dhe të funksionalizoj teknologjitë 5G, me kusht që ARKEP të vendosë të ndajë brezin frekuencor së shpejti dhe me kushte të mira”, ka deklaruar Zyferi për Express, transmeton Paparaci.
Tutje kanë thënë se shpresojnë që të zgjidhen problemet me energji elektrike, meqë po ndikon në cilësinë dhe kostot e funksionimit të rrjeteve.
Se reduktimet e rrymës i kanë shkaktuar këto probleme, e kanë konfirmuar edhe nga ARKEP’i.
Për këtë çështje, ARKEP thotë se ka kërkuar informata të detajuara nga Telekomi dhe IPKO.
“Siç jeni në dijeni mungesa e energjisë elektrike ditëve të fundit përveç që ka ndikuar dhe shkaktuar telashe në shumë sektor tjerë, po ashtu ka shkaktuar probleme edhe në fushën e komunikimeve elektronike, përkatësisht mungesë apo rënie të sinjalit në rrjetat mobile, pasi që funksionimi i stacioneve bazë dhe dërgimi i sinjaleve (valëve) të telefonisë mobile, varet drejtpërdrejtë prej furnizimit me energji elektrike. Lidhur me këtë, ARKEP ka kërkuar nga operatorët mobil informata të detajuara dhe një gjendje të tillë e kanë konfirmuar në komunikatat e tyre (https://kosovotelecom.com/njoftime/ ) si dhe në shkresat zyrtare, (IPKO – përmes shkresës zyrtare). Rënia e sinjalit në pjesë të caktuara ka ndikuar edhe në mbingarkesen e rrjetit, rrjedhimisht edhe në kualitetin e shërbimeve të ofruara”, thuhet në përgjigjet e ARKEP’it drejtuar Gazetës Express.
E për kërkesën e operatorëve për zgjerim të brezit frekuencor, kanë deklaruar se po punojnë në këtë drejtim.
“Në fund dëshirojmë të ju njoftojmë se ARKEP në funksion të detyrave dhe përgjegjësive që ka sipas Ligjit për Komunikimet Elektronike, është duke bërë të gjitha përpjekjet me qëllim të rritjen e cilësisë së ofrimit të shërbimeve, krijimin e lehtësirave dhe dhënies së kapaciteteve shtesë të resurseve frekuencore, ashtu që të ofrohen shërbime të komunikimeve elektronike me kualitet të lartë në tërë territorin e Republikës së Kosovës”, ka deklaruar ARKEP.
Ndërkohë, Telekomi i Kosovës s’ka kthyer përgjigje deri në momentin e publikimit të tekstit.
