Më 18 maj pritet të mbahet një tjetër protestë në Shkup, e organizuar për të kërkuar të drejtën e studentëve shqiptarë që provimin e jurisprudencës ta japin në gjuhën shqipe.
Thirrjes për mbështetje të kësaj proteste i është bashkuar edhe ish-kapiteni i Kombëtares shqiptare të futbollit, Lorik Cana, i cili përmes një reagimi publik ka kërkuar solidarizim dhe pjesëmarrje sa më të madhe.
“Gjuha është një nga shtyllat e identitetit; kur ajo mohohet, mohohen të gjitha të drejtat për barazi, zhvillim dhe përkatësi”, ka shkruar Cana.
Ai ka theksuar se shqiptarët nuk po kërkojnë më shumë sesa të drejtën për të studiuar në gjuhën e tyre.
“Ne nuk pretendojmë asgjë më shumë sesa atë që kemi fituar nëpërmjet sakrificës së paraardhësve tanë dhe të drejtës sonë të studiojmë në gjuhën tonë etnike, autoktone dhe shtetformuese. Bashkohu dhe ti”, ka shtuar ai.
