Një studim i ri i publikuar në revistën shkencore Science Advances tregon se modelet e mëdha gjuhësore si ChatGPT kanë aftësinë të vetëorganizohen dhe të krijojnë spontanisht norma sjelljeje, pa pasur nevojë për ndërhyrje njerëzore.
Sipas mediave italiane, hulumtimi është udhëhequr nga shkencëtari italian Andrea Baronchelli, i cili punon në universitetin londinez City, St George’s.
“Mekanizmi është i njëjtë me atë që qëndron në themel të shumicës së sjelljeve të ndërlikuara njerëzore, si rregullat e mirësjelljes, kodi i veshjes dhe normat morale,” tha Baronchelli.
Në eksperiment, dy grupe modelesh si ChatGPT u përfshinë në një lojë koordinimi ku u kërkua të zgjedhin emra nga disa opsione. Modelet fitonin pikë për përputhje dhe humbnin pikë për mospërputhje, duke stimuluar krijimin e konventave përmes ndërveprimeve të përsëritura.
