Në një konferencë për shtyp që zgjati një orë, Donald Trump shpjegoi sfondin e sulmit të SHBA-së ndaj Venezuelës.
Për këtë, SkyNews ka bërë një përmbledhje të shpejtë të gjërave më të rëndësishme që presidenti amerikan tha nga fjalimi i tij:
Donald Trump tha se SHBA-ja do ta “drejtojë” Venezuelën deri sa të mund të realizohet një “tranzicion i duhur”. Ai shtoi se kjo do të përfshijë edhe hyrjen e kompanive amerikane të naftës në vend, të cilat do të “fillojnë të krijojnë të ardhura për vendin”;
Ai paralajmëroi se SHBA-ja është e gatshme të kryejë një sulm të dytë, “shumë më të madh”, nëse do të jetë e nevojshme. Sipas Trump, ky sulm ishte planifikuar fillimisht, por sulmi i parë rezultoi i mjaftueshëm për momentin;
Gjenerali Dan Caine, oficeri më i lartë ushtarak i SHBA-së, dha gjithashtu detaje për sulmin, duke thënë se Nicolas Maduro dhe bashkëshortja e tij “u dorëzuan” dhe u morën në paraburgim, pa humbje jete nga pala amerikane, pavarësisht një shkëmbimi zjarri. Forcat amerikane kishin mbërritur në kompleksin e tij në orën 2:01 të mëngjesit sipas kohës lokale dhe e kishin marrë Maduron dhe bashkëshorten e tij në një anije luftarake amerikane rreth dy orë e gjysmë më vonë;
Maria Corina Machado, udhëheqësja e opozitës venezueliane që fitoi Çmimin Nobel për Paqe vitin e kaluar, nuk ka gjasa të jetë udhëheqësja e ardhshme, sepse “nuk e ka mbështetjen”, tha Trump. Ndërkohë, zëvendëspresidentja e Maduros, Delcy Rodriguez, u betua për ta zëvendësuar atë dhe tha se ishte “e gatshme të bëjë atë që mendojmë se është e nevojshme për ta bërë Venezuelën sërish të madhe”, sipas Trump;
Trump gjithashtu kërcënoi Kubën dhe Kolumbinë. Për këtë të fundit, ai tha se udhëheqësi i majtë, Gustavo Petro, “po prodhonte kokainë… kështu që duhet të ketë kujdes”, tha Trump. Marco Rubio shtoi se edhe qeveria komuniste kubane duhet të shqetësohet. Qëllimi i gjithë kësaj ishte të “rrethohemi me stabilitet” dhe të riafirmohet “fuqia amerikane në rajonin tonë”, tha Trump.
