Ragip Mustafa njihet si njëri prej biznesmenëve më të fuqishëm në Kosovë, i cili vazhdimisht përfiton tender publik, sidomos në institucionet shtetërore që udhëheqen nga LDK-ja dhe jo vetëm. Ai këtë muaj është shpërblyer edhe me një tender në një prej institucioneve që udhëheqen nga LDK-ja. Fjala është për Komunën e Prishtinës me kryetar Përparim Ramën e LDK-së, komunë kjo që i ka dhënë tenderin për “punë tjera” në ndërtimin e shkollës “7 Shtatori”, raporton Veriu.info.
Për këtë tender të shpallur nga Komuna e Prishtinës kishin konkuruar tre (3) operator ekonomik, ku dy (2) prej tyre kishin ofertuar me çmime më të ulëta.
“Nika pro-Ing” Sh.P.K kishte ofertuar me çmim prej 138,448 euro, ndërsa “Limora” Sh.P.K. me çmim prej 139,129 euro, por që të dy këto kompani janë elinimuar nga Zyra e Prokurimit e Komunës së Prishtinës
Më 13.02.2025 Zyrtari i Prokurimit i Komunës së Prishtinës, Visar Shehu, ka lëshuar njoftim për vendimin e marrë nga kjo komunë, ku operatori ekonomik “Olti Trasing” Sh.P.K. shpërblehet me kontratë në bazë të ofetës me çmim prej 144,000.00 euro.
Veriu.info ka gjetur se kompania “Olti Trasing” Sh.P.K. është në pronësi të Ragip Mustafës, i cili në opinion njihet si Ragip “Zhaba”. Ai është anëtar i Këshillit të Përgjithshëm të LDK-së, parti kjo të cilës i përket kryetari i Prishtinës, Përparim Rama.
Ndryshe, Në mars 2023, komuna kishte lidhur një kontratë me grupin e operatorëve ekonomikë “Olti Trasing SH.P.K.” dhe “Beni Dona GR” për ndërtimin e kësaj shkollë. Që të dy kompanitë janë në pronësinë e biznesmenit Ragip Mustafa, një person tradicionalisht i lidhur me LDK-në. Vlera e kontratës fillestare ishte 1,878,000.00 euro.
Pasi filluan punimet, komuna konsideroi se projekti nuk ishte hartuar siç duhet dhe aprovoi disa punë shtesë në një vlerë prej 55,635.30 euro. Aneks kontrata për këto punë shtesë u lidh në korrik të vitit të kaluar dhe punët shtesë u përllogaritën të përbënin 2.96% të vlerës së kontratës fillestare.
Në shtator 2024, komuna shpalli një kontratë të re me negocim për punët shtesë të “Ndërtimit të shkollës së mesme ‘7 Shtatori’”. Vlera e asaj kontrate ishte 132,100.97 euro ose 7.03% e vlerës fillestare të kontratës. Pavarësisht se punët shtesë të para ishin në nivelin e 2.96%, vlera e re e punëve shtesë është afërsisht 7% e kontratës fillestare, e cila është ende brenda kufirit ligjor prej 10%. Megjithatë, është e zakonshme që punët shtesë të arrijnë vlera më të larta si 3%, 5% ose 6% të vlerës bazë të kontratës, pasi që raste si ky janë të rralla, shkruante portali Demokracia.
