Rasti i kanosjes ku është përfshirë biznesmeni nga Peja, Jeton Buquku, pronar i fabrikës “Buquku”, për të cilin Sinjali raportoi para disa javësh është konfirmuar nga Policia dhe Prokuroria Themelore në Pejë. Përveç këtij rasti që u denoncua në qershor, Jeton Buquku, u raportua edhe për kanosjen e djalit të viktimës në atë rast – për çka ekziston një kallëzim penal, raporton Gazeta Sinjali.
Në audio incizimin e publikuar nga Gazeta Sinjali, Buquku e kishte konfirmuar vet përfshirjen e tij në rastin e parë, pasi biseda ishte realizuar disa ditë pas denoncimit në kanosjes.
Personi që dëgjohej duke folur me Jeton Buqukun është djali i viktimës që e ka raportuar rastin në Polici dhe të dy janë pjesë e katërshes së akuzuar nga familja Buquku për incidentet te bizneset e tyre.
Kallëzimi penal ndaj tij ishte dorëzuar më 30 korrik në Polici, ku propozohej që të nxirret aktvendim për nisjen e hetimeve ndaj tij, në drejtim të veprës penale ‘Kanosja’.
Siç ka marrë vesh Sinjali, djali i viktimës fillimisht ia ka lënë disa mesazhe Jeton Buqukut për kërcënimin ndaj babait të tij dhe më pas kanë folur në telefon.
Në mesazhet që ka siguruar redaksia, i riu pretendon se Jeton Buquku ka tentuar t’i bindë atë dhe babanë e tij për të dëshmuar rrejshëm për rastet që kanë ndodhur. Sipas tyre, qëllimi i vetëm i tij ka qenë që ata të përmendin emrin e një personi – të cilit dyshohet se Jeton Buquku ia ka borxh një shumë të majme parash.
Por, ndonëse Jeton Buquku nuk i është përgjigjur me mesazhe personit në fjalë, ky i fundit e ka telefonuar dhe kanë zhvilluar një bisedë me të shara, ku mes tjerash Buquku e konfirmon rastin e 8 qershorit.
Djali i viktimës në fillim e pyet pse e ka ndalur babanë e vet dhe e ka sharë, ndërsa kur Jeton Buquku ia kthen “s’pe din ti çka o në pyetje a?”, nisin të sharat me njëri tjetrin dhe kërcënimet.
Përveç sharjeve, Buquku e kanos personin në fjalë se “unë ta shti bombën në gojë” e më pas thotë se “ta kom rreh shuplaka babën” – duke iu referuar rastit të 8 qershorit.
Ai madje dëgjohet duke u tallur për denoncimin e rastit, ku thotë “ish shku n’Polici t’u kajtë”.
“Aty a, se s’pe din ti çka o n’pytje a? Unë vi ta q* edhe nanën. Ku je o burrë… n’fyt kom me ta pre. Ty kom me ta q* edhe nanën edhe babën… Ku jeni mësu me gjujtë msheftë? Une ta shti bombën në gojë..Tash e di me kond kom punë e tash t’kallxoj. Ku t’ju nxo, ju rrehi…Ta kom rreh shuplaka babën..Ish shku n’Polici t’u kajtë. Prej sotit e sheh ku t’nxo…“ – thotë Jeton Buquku.
Nga Policia Rajonale në Pejë kanë bërë të ditur shkurt se në koordinim me Prokurorinë janë ndërmarrë veprimet e nevojshme dhe janë intervistuar palët.
Ndërsa nga prokuroria kanë njoftuar se Prokurori i Shtetit ka dhënë autorizimet e nevojshme për zbardhjen e rastit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
