Prokuroria Speciale e Republikës së Kosovës ka dhënë detaje lidhur me aksionin e Njësisë Speciale të Policisë së Kosovës të cilët mëngjesin e sotëm kanë kryer bastisje në pesë lokacione të ndryshme në veri të vendit, përfshirë pronat e Milan Radoiçiqit.
Përmes një komunikate për media, Prokuroria Speciale njofton se operacioni policor ndërlidhet me sulmin terrorist të datës 24.9.2023, në fshatin Banjskë të komunës së Zveçanit, si dhe urdhër kontrolli është zhvilluar në pronat e të dyshuarve M.R dhe V.R. dhe në hapësirën e një objekti ndihmës të Spitalit Rajonal në Mitrovicë-Veri.
“Pas realizimit të urdhër kontrollit në pronat e të dyshuarve janë sekuestruar në cilësi të provave materiale:
2 Automjete Mercedes
Argjend 4.84 Kg
2 Motor 4X4
1 Barkë-Anije
7 DVR
2 Pllaka antiplumb me dy mbrojtës
3 Thika
2 Rutera
2 Çelësa të veturave
5 Gëzhoja
1 Dronë
5 USB
1 Kamera GoPro- SSD
1 Video kamerë me kartelë
1 Shënjestër optike
1 Spray
7 telefona celular”, thuhet në komunikatë
Po ashtu, PSRK do të parashtrojë urdhrin ndalues në Gjykatën kompetente për sekuestrim të një vile buzë liqenit të Ujmanit, një penthouse dhe një lokali që janë në pronësi të Radoiçiqit.
Prokuroria Speciale njofton se Policia e Kosovës do të vazhdojë me angazhimet e saja në realizimin e
Ndryshe, Milan Radoiçiq, e ka pranuar se ka qenë në fshatin Banjskë të Zveçanit më 24 shtator, ku një grup i armatosur serb ka kryer sulm terrorist ndaj Policisë së Kosovës, duke lënë të vrarë rreshterin policor, Afrim Bunjaku.
Ai e ka bërë këtë deklaratë përmes një letre të lexuar nga avokati i tij, Goran Petronijeviq, për publikun nga Beogradi. Radoiçiq e ka pranuar se i ka bërë të gjitha përgatitjet logjistike për ngjarjet e 24 shtatorit në Banjskë.
Radoiçiq i ka akuzuar autoritetet në Prishtinë, të udhëhequra nga kryeministri i Kosovës Albin Kurti, për “pushtim të paligjshëm të veriut të Kosovës”.
Ai ka vlerësuar se sulmuesit nuk janë “terroristë”, por “luftëtarë për lirinë e popullit të tyre”.
Ndërkohë, ministri i Brendshëm, Xhelal Sveçla, ka publikuar pamjet nga pronat e Radoiçiqit, duke thënë se nuk bëhet fjalë për luftëtar lirie, por për një Pablo Escobar të rajonit.
