Tifozët e kombëtares shqiptare kanë ngritur shqetësime të mëdha ndaj mënyrës sesi po trajtohen nga Federata Shqiptare e Futbollit.
Kritikat kryesore përfshijnë mungesën e transparencës në shpërndarjen e biletave, shkeljen e strukturave të vendosura të tifozërisë dhe situatën rreth bashkëpunimi me Serbinë për Kampionatin Evropian U21 2027.
Tifozët kanë theksuar se procedurat aktuale të shpërndarjes së biletave duken të padrejta dhe diskriminuese, duke lënë jashtë vëmendjes grupe të rëndësishme si Tifozat Kuq e Zi që ndër vite kanë mbështetur kombëtaren me përkushtim të pashoq.
Për më tepër, ata shprehin shqetësim për një mungesë të qartë komunikimi dhe përjashtimi të paarsyeshëm, që po dëmton ndjeshëm atmosferën në stadiume.
Një tjetër pikë kritike është bashkëpunimi i FSHF-së me Serbinë për organizimin e Evropianit U21 2027.
Ky konsiderohet si veprim i papranueshëm nga tifozët, të cilët e quajnë një fyerje ndaj popullit shqiptar, duke marrë parasysh të kaluarën historike dhe marrëdhëniet e ndërlikuara me Serbinë.
Pikat e kritikës:
1/ Mungesa e transparencës në shpërndarjen e biletave:
Procedurat aktuale të shpërndarjes duken të rastësishme dhe të pandershme. Tifozeritë e organizuara si TKZ, të cilat prej vitesh e mbështesin Kombëtaren me shpirt e zemër, po neglizhohen ose po diskriminohen.
2/ Shkelja e strukturave të vendosura të tifozërisë:
Në vend që të pranohen tifozëritë e organizuara si një pjesë thelbësore e kulturës së mbështetjes, po përjashtohemi përmes mungesës së komunikimit dhe shpërndarjes së padrejtë të biletave. Kjo jo vetëm që dëmton motivimin e grupeve të tifozëve, por edhe atmosferën në stadiume.
Veçanërisht shqetësuese është se na janë marrë biletat nën petkun e “Gjithëpërfshirjes” pa asnjë komunikim zyrtar. Ky hap nga ana jonë konsiderohet qartësisht si hakmarrje për qëndrimin tonë kritik ndaj bashkëpunimit me Serbinë për organizimin e Kampionatit Europian U21 2027.
3/ Bashkëpunimi me Serbinë për Europianin U21 2027:
Mbështetja e Federatës Shqiptare të Futbollit (FSHF) për një bashkëpunim me Serbinë është e papranueshme dhe thellësisht shqetësuese për ne.
Një bashkëpunim me një shtet që në të kaluarën e afërt ka kryer masakra të tmerrshme ndaj popullit shqiptar dhe që vazhdon të shfaqë armiqësi të hapur ndaj shqiptarëve, përbën një shkelje të çdo etike dhe norme morale.
Vendimi për të çuar përpara këtë bashkëpunim pa asnjë konsultim me tifozëritë e organizuara tregon për një mungesë respekti dhe përgjegjësie ndaj të gjithë atyre që prej vitesh qëndrojnë pasionuar pas Kombëtares.
Kërkesat tona:
1/ Një sistem transparent dhe i drejtë për shpërndarjen e biletave, që merr parasysh interesat e tifozerive të organizuara.
2/ Dialogje të rregullta mes Federatës Shqiptare të Futbollit (FSHF) dhe grupeve të tifozëve për të identifikuar problemet në kohë dhe për të gjetur zgjidhje të përbashkëta.
3/ Natyrisht, ne kërkojmë me forcë që kjo bashkëpunim me Serbinë të mos realizohet dhe të ndërpritet menjëherë, pasi është një fyerje e rëndë ndaj gjithë tifozëve shqiptarë dhe një akt që bie ndesh me çdo parim moral e kombëtar.
