Donald Trump u ka bërë homazhe ushtarëve britanikë “shumë të guximshëm” që shërbyen në Afganistan – pas kritikave të ashpra për pretendimin e tij se trupat jo-amerikane kishin qëndruar larg vijës së frontit.
Në Truth Social, ai tha se britanikët “ishin ndër luftëtarët më të mëdhenj të të gjitha kohërave”, ndërsa pranoi vdekjen e 457 prej tyre dhe faktin që shumë të tjerë u “plagosën rëndë”, raporton Sky News.
Ai shkroi: “Ushtarët e MËDHENJ dhe shumë TRIMA të Mbretërisë së Bashkuar do të jenë gjithmonë me Shtetet e Bashkuara të Amerikës!”
“Është një lidhje shumë e fortë për t’u thyer ndonjëherë,” shtoi presidenti amerikan. “Ushtria e Mbretërisë së Bashkuar, me Zemër dhe Shpirt të jashtëzakonshëm, nuk ka të dytë (përveç SHBA-së!). Ju duam të gjithëve dhe gjithmonë do t’ju duam!”
Postimi i presidentit Trump vjen pas komenteve për Fox News, në të cilat ai pretendoi gabimisht se trupat e NATO-s në Afganistan kishin “qëndruar pak më prapa, pak jashtë vijës së frontit”.
Sir Keir Starmer, dukshëm i zemëruar, i quajti këto komente “fyese dhe sinqerisht të tmerrshme”, ndërsa Princi Harry gjithashtu mbrojti guximin e trupave britanike.
Princi – i cili ka shërbyer dy herë në Afganistan – tha se “sakrificat britanike meritojnë të përmenden me të vërtetë dhe me respekt”.
Mësohet se kryeministri ka folur me zotin Trump pak para postimit të presidentit amerikan në Truth Social të shtunën.
