Ish-trajneri i Chelsea-t, Thomas Tuchel, ka zhvilluar bisedime me Federatën e Futbollit (FA) për t’u bërë trajneri i ardhshëm i Anglisë.
Anglia ka qenë pa një trajner të përhershëm që kur Gareth Southgate dha dorëheqjen pas humbjes së “Tre Luanëve” në finalen e Euro 2024 ndaj Spanjës.
Lee Carsley u caktua si trajner i përkohshëm “me qëllimin për të mbajtur këtë pozicion gjatë vjeshtës” ndërsa FA po vlerësonte opsionet e përshtatshme.
BBC është informuar nga dy burime të ndryshme se kanë ndodhur bisedime fillestare me gjermanin Tuchel.
Një kontakt ishte bërë gjithashtu edhe me trajnerin e Manchester City-t, Pep Guardiola, gjatë verës.
Tuchel u largua nga Bayern Munich në maj, megjithëse kishte ende një vit të mbetur në kontratën e tij, pasi gjigantët gjermanë nuk arritën të fitonin titullin e Bundesligës për herë të parë që nga sezoni 2011-12.
Ai ka drejtuar më parë edhe Mainz, Borussia Dortmund dhe Paris Saint-Germain.
Tuchel, 51 vjeç, ishte trajneri i Chelsea-t nga janari 2021 deri në shtator 2022 – ku fitoi Ligën e Kampionëve, Kupën Botërore të Klubeve FIFA dhe Superkupën e UEFA-s përpara se të shkarkohej.
Në qershor, Tuchel përjashtoi veten nga gara për të marrë drejtimin e Manchester United – kuptohet se ai u takua me bashkëpronarët e “Djajve të Kuq”, përfshirë Sir Jim Ratcliffe, në Francë.
Nëse emërohet, Tuchel do të bëhej trajneri i tretë jo-britanik që drejton ekipin e meshkujve të Anglisë pas Sven-Goran Eriksson dhe Fabio Capello.
