Inspektorati i Punës ka nxjerr vendimin për dënim me gjobë në vlerë prej 300 euro për institucionin komuna e Mitrovicës së Veriut, pasi kjo e fundit shkeli Ligjin e Punës duke ua ndërprerë pagat tre mësimdhënësve të kësaj komune.
Komuna e Mitrovicës së Veriut e cila drejtohet nga Erden Atiq i Lëvizjes Vetëvendosje, ka ndërprerë pagat për disa punonjës të kësaj komune me arsyetimin e mosparaqitjes në punë, por kjo sipas Inspektoratit të Punës ka qenë shkelje e Ligjit të Punës andaj edhe është dënuar me gjobë.
Gazeta Online Veriu.info ka siguruar vendimin e Inspektoratit të Punës shkalla e dytë me të cilin vërtetohet vendimi i shkallës së parë për dënimin e Komunës së Mitrovicës së Veriut, e cila sipas Inspektoratit ka shkelur dispozitat e nenit 55 të Ligjit të Punës.
Sipas vendimit të Inspektoratit zyra e personelit e komunës së Mitrovicës së Veriut ka kërkuar dëshmitë e vijueshmërisë në punë nga vet punonjësit, duke mos e pasur të qartë kompetencën e vet, pasi dëshmitë e tilla merren nga administruesit dhe sekretarët e shkollave.
Sipas burimeve të Veriu.info janë edhe disa raste tjera të fituara në Gjykatë e cila obligon komunën e Mitrovicës Veriore t’ua paguaj në mënyrë retroaktive pagat e papaguara që nga mesi i vitit të kaluar kur komuna e drejtuar nga Erden Atiq vendosi t’ua ndalë ato.
