Pas përfundimit të muajit të shenjtë të Ramazanit, miliona myslimanë në të gjithë botën, por edhe në Kosovë festojnë sot Fitër Bajramin. Lutjet për familjarët e të afërmit, mirënjohjet e falënderimit janë të shumta.
Një urim mjaft domethënës e publikoi sot edhe oftamologu në Klinikën e Oftamologjisë, Florim Zejnullahu, të cilin e mori nga heroi i gjallë, Artur Mrasori, zyrtari policor që kishte mbetur i lënduar rëndë në shpërthimin në Zhur të Prizrenit, para disa vitesh.
Zejnullahu ka qenë mjeku i parë që është marrë me intervenimin në sytë e Mrasorit, natën e 28 janarit 2020, kur ai u transferua në klinikë për t’u trajtuar si pasojë e plagëve që mori.
Në këtë ditë feste, si çdo herë tjetër, Mrasori ka shprehur falënderimin dhe mirënjohjen e madhe ndaj tij, për gjithë punën e bërë në betejën shëndetësore që nisi atë natë dhe vazhdon ta ketë edhe sot.
Edhe oftamologu Zejnullahu, i cili e publikoi bisedën me Mrasorin, tha se ky është urimi më i mirë, duke shprehur po ashtu mirënjohjen e tij.
“Urimi më i mirë që mora sot!
Motiv që Klinika e Syve të prosperoj edhe më shumë në kuptim të ngritjes së kualitetit të shërbimeve që jap!
Respekt për Artur Mrasorin policin Hero në krye të detyrës!” – ka shkruar ai, duke publikuar edhe mesazhin e Mrasorit.
