Një raport i Inspektoratit Farmaceutik të Kosovës ka nxjerrë në pah shkelje serioze në barnatoren “Valon Farm” me seli në Lipjan, ku gjatë një inspektimi zyrtar janë konstatuar mungesa e farmacistit përgjegjës në vendin e punës dhe prania e produkteve medicinale ilegale, të cilat më pas janë regjistruar dhe konfiskuar nga inspektorët.
Sipas dokumenteve të siguruara nga Front Online, inspektimi në këtë barnatore është kryer më 10 mars 2025, nga ekipi i Inspektoratit Farmaceutik në kuadër të Ministrisë së Shëndetësisë.
Në raport thuhet se inspektimi është zhvilluar bazuar në Ligjin për Shëndetësi, Ligjin për Produkte dhe Pajisje Medicinale dhe udhëzimet administrative që rregullojnë veprimtarinë farmaceutike.
Gjatë kontrollit, inspektorët kanë verifikuar licencën e barnatores, licencën e farmacistit përgjegjës, prezencën e stafit profesional, si dhe produktet medicinale që gjendeshin në objekt.
Sipas konstatimeve të inspektorëve, barnatorja ishte e hapur dhe po ofronte shërbime farmaceutike, por farmacistja përgjegjëse nuk ndodhej në vendin e punës në momentin e inspektimit.
Ky fakt, sipas raportit, është evidentuar edhe në procesverbalin e inspektimit, i cili është lexuar para palës dhe është nënshkruar pa vërejtje.
Në dokument thuhet se “Valon Farm” posedonte licencë të lëshuar nga AKPPM, ndërsa farmaciste përgjegjëse figuron Fitore Mehmeti. Megjithatë, inspektorët kanë konstatuar se në momentin e kontrollit ajo nuk ishte e pranishme në barnatore.
Përveç mungesës së stafit profesional përgjegjës, inspektorët kanë evidentuar edhe produkte ilegale në hapësirat e barnatores. Në raport theksohet se gjatë kontrollit “janë gjetur produkte ilegale të cilat janë regjistruar dhe konfiskuar nga Inspektorati Farmaceutik”.
Në listat përcjellëse të konfiskimit, të bashkëngjitura me raportin, figurojnë dhjetëra produkte medicinale dhe preparate të ndryshme, me të dhëna për prodhuesin, dozën, formën farmaceutike, numrin serik, datën e skadimit dhe sasinë e paketimit. Këto lista janë pjesë e dokumentacionit zyrtar të inspektimit dhe mbajnë nënshkrimet përkatëse të palës prezente dhe inspektorëve.
Pas përfundimit të inspektimit, Inspektorati ka dalë me disa rekomandime të qarta për barnatoren.
Në raport kërkohet që subjekti të operojë vetëm konform kërkesave ligjore, të sigurojë praninë e farmacistit përgjegjës gjatë gjithë orarit të punës, siç përcaktohet me ligj, si dhe të qarkullojë vetëm produkte medicinale të regjistruara dhe të autorizuara nga Agjencia Kosovare për Produkte dhe Pajisje Medicinale.
Raporti po ashtu bën të ditur se, pas inspektimeve të përsëritura, barnatorja është konstatuar se ka vazhduar të kryejë të njëjtat shkelje, të cilat sipas dokumentit zyrtar përbëjnë shkelje serioze të ligjeve në fuqi.
