Veriu.info sot raportoi ekskluzivisht për vdekjen e një personi në depon e biznesit të tij, një ngjarje e rëndë kjo që ka ndodhur në fshatin Dobërllukë të Vushtrrisë.
Viktima është biznesmeni vushtrrias, Behxhet Uka, 54-vjeçar, i cili dyshohet se ka kryer vetëvrasje.
Burimet e Gazetës Sinjali bëjnë të ditur se i ndjeri vuante nga një sëmundje e rëndë, e cila e kishte shtyrë që të izolohet tërësisht nga kontakti me njerëz.
Mësohet se si pasojë e kësaj, 54-vjeçari kishte rënë në depresion, për çka edhe dyshohet se mori vendimin që t’i japë fund jetës së tij.
Si vend për të kryer këtë akt tragjik, Uka kishte zgjedhur depon e biznesit të tij ‘Uka Izolim’, ku njësitet hetimore dhe ato të Forenzikës pas daljes në vendin e ngjarjes kanë gjetur një revole, një karikator, 10 fishekë dhe një gëzhojë, të cilat më pas janë konfiskuar.
Uka është gjetur pa shenja jete sot rreth orës 10:00, ku nga ekzaminimi i trupit nga ana e mjekëve, është identifikuar një vrimë hyrëse në kokën e tij, që dyshohet se është shkaktuar nga arma e zjarrit e cila u gjet në prehrin e tij.
Rastin e ka konfirmuar edhe zëdhënësi i Policisë për rajonin e Mitrovicës, Ilmi Prekazi, duke thënë që po trajtohet si vdekje e dyshimtë.
