Policia ka konfirmuar se një punëtor ndërtimtarie ka vdekur pasi ka rënë nga një lartësi nga objekti ku po punonte në lagjen “Veternik”, në Prishtinë.
“Rreth orës 11:00 është marrë informata se një person, rreth 50 vjeç, ka rënë nga një lartësi derisa ka qenë duke punuar në një objekt në lagjen ‘Veternik’. Si pasojë e lëndimeve, personi, mashkull (shtetas i huaj), ka ndërruar jetë. Vdekja e tij është konstatuar nga ekipi i mjekëve emergjent në vendin e ngjarjes”, thuhet në njoftimin e Policisë.
Po ashtu, Policia ka bërë të ditur se në koordinim me inspektorët e punës dhe prokurorinë kanë nisur hetimin e rrethanave që karakterizojnë rastin.
Veriu.info mëson se i ndjeri ka qenë duke punuar në objektin e qendrës tregtare “Albi Mall”.
