Sezonin e kaluar, të gjithë u habitën kur në krye të Partizanit u vendos një trajner nga Serbia. Nuk ishte ndonjë tabu, sepse edhe në Korçë atë kohë ishte Ivan Gvozenoviç që drejtonte skuadrën.
Pas përfundimit të gjysmës së kampionatit, të kuqtë vendosën të largonin Aleksandër Veselinoviçin, edhe pse ekipi ishte në vend të katërt. Gjithsesi, në prag të ndeshjes Shqipëri-Serbi që do të luhet të shtunën e 7 qershorit, Veselinoviç ka dhënë një intervistë për median “sport.alo.rs”, ku ndër të tjera, i identifikon banorët e Tiranës si shumë mikpritës. Ai flet për Silvinjon, ekipin dhe sulmin pa fantazi që ka Shqipëria. Ish-trajneri i Partizanit mendon se mbrojtja e Serbisë nuk do të ketë shumë punë në atë ndeshje, edhe pse mirë është që të shënojë ajo e para.
A mund të jetë thelbësore përgatitja psikologjike?
Për shkak të historisë dhe politikës, na udhëheqin emocionet, por ato duhet të mbeten brenda kuadrit normal. Besoj se Stojkoviç dhe lojtarët tanë me përvojë do të arrijnë t’i mbajnë gjërat në një nivel që do të na çojë drejt fitores.
A është Shqipëria e thjeshtë për t’u mposhtur?
Është një ekip i orientuar në mbrojtje, kompakt dhe me shumë përkushtim… Me këtë pjesë të skuadrës punon ndihmëstrajneri argjentinas Zabaleta, i cili është bërë i njohur për kontributin e tij në mbrojtje. Ata gjithmonë luajnë me përgjegjësi maksimale, ndërsa dobësia më e madhe e tyre është mungesa e kreativitetit në sulm. Por ata po përmirësohen shumë, është e jashtëzakonshme sa shumë lojtarët besojnë te trajneri Silvinjo. Braziliani i ka magjepsur dhe ka sjellë shumë përparime në lojë, sidomos krahasuar me trajnerët e mëparshëm italianë, që e shikonin futbollin nga një këndvështrim tjetër.
Silvinjo nuk ka një CV-i të veçantë trajneri…
Lion, Korinthiasi dhe tani Shqipëria. Ata janë të kënaqur me mënyrën se si ai punon dhe gjithë sekreti i suksesit qëndron në faktin se lojtarët i besojnë atij. Thjesht i ka magjepsur dhe janë të gatshëm të sakrifikohen për të, duke treguar disiplinë të jashtëzakonshme në lojë, me të cilën kompensojnë mangësitë.
A do të luhet në një stadium modern në Tiranë?
Është një objekt me akustikë fantastike, ku u luajt edhe finalja e Ligës së Konferencës, Roma-Fejnord 1:0. Si trajner i Partizanit, kam luajtur atje tre derbi ndaj Tiranës dhe mbaj vetëm përshtypje pozitive. Kur i shton edhe britmat e tifozëve nga tribunat, atëherë ke një pamje të plotë, të vërtetë të futbollit.
A prisni trazira?
Jo! Ata do të bëjnë gjithçka që ndeshja të organizohet maksimalisht mirë. Presidenti i tyre i Federatës, Duka, ka marrëdhënie të shkëlqyera me UEFA-n, është pranë Ceferinit dhe, kur flet me Infantinon, flasin si vëllezër. Ai arriti që të bashkorganizojmë Kampionatin Europian për të rinj… Nuk u intereson që të ndodhë diçka që do t’i hedhë hije. Për më tepër, UEFA gjatë shortit nuk i ndau këto përfaqësuese, gjë që zakonisht bën kur parashikon probleme.
Në tribunat e stadiumit janë kryesisht shqiptarët nga Kosova. A janë shitur të gjitha biletat?
Jo zyrtarisht mora vesh se shumicën e biletave i kanë blerë shqiptarët nga Kosova, të cilët janë shumë të ndryshëm nga vendësit (të Shqipërisë), të cilëve as nuk u shkon në mend të flasin apo të merren me politikë. Megjithatë, nuk pres probleme të veçanta për skuadrën tonë.
Çfarë tjetër e karakterizon përfaqësuesen e Shqipërisë?
Në thelb, ata kanë një strategji të qartë zhvillimi të futbollit, me ndikime të mëdha fillimisht nga trajnerët kroatë, e më pas ata italianë, të cilët vijnë me dëshirë në Shqipëri sepse është afër. Ata janë gjithmonë të motivuar, plot vetëbesim dhe për një gol nuk kaluan në ligën më të lartë të Ligës së Kombeve, por kundër Ukrainës, Çekisë dhe Gjeorgjisë, ndeshjet që i kam parë “live”, kanë luajtur shumë mirë. Gjithashtu, një e treta e lojtarëve vijnë nga Serie A, janë bashkë prej kohësh, janë të etur për sukses, dhe kanë edhe asete të fshehta si Asani që luan në Korenë e Jugut, për të cilin tashmë po interesohen menaxherë të njohur nga klubet e “Top 5” ligave.
Çfarë duhet të na shqetësojë?
Janë jashtëzakonisht të rrezikshëm në tranzicion dhe gjatë goditjeve standarde, por duke parë përbërjen e mbrojtjes sonë, besoj se nuk do të kemi probleme nëse përgatitemi mirë psikologjikisht dhe taktikisht. Do të ishte ideale të shënojmë të parët dhe të marrim ndeshjen në ritmin që na përshtatet. Problemi më i madh i Shqipërisë është mungesa e kreativitetit në sulm.
Falë futbollit keni udhëtuar në të gjithë botën, cili ishte populli më mikpritës?
Si lojtar dhe trajner kam qëndruar 16 vjet në tetë vende dhe besoni, askund nuk kam takuar njerëz më të sjellshëm se banorët e Tiranës. Ka ndodhur që një taksist nuk pranoi të merrte para nga ndihmësi im, Dragani Aniçiç, edhe pse dinte që ai ishte pjesë e Partizanit, ndërkohë që ai ishte tifoz i rivalit të madh qytetar! Megjithatë, Dragani nuk e pranoi këtë “falje” dhe ia shpërbleu.
Çfarë ju ka habitur më shumë?
Futbollistët shqiptarë janë të shkëlqyer nga ana motorike dhe fizike në garë. Janë të zellshëm, punëtorë, të disiplinuar, fanatikë dhe agresivë, kanë ndjeshmëri për lojën dhe është kënaqësi të punosh me ta. Mendoj se janë më të shpejtë se ne, kanë energji dhe krenari, por jo shumë të fortë fizikisht. Duke punuar tetë vjet në Rusi, mund t’i krahasoj. Rusët janë krejt të ndryshëm, duhet të kompensojnë të gjitha dobësitë me punë, por janë dominues fizikisht.
