Ylli i Real Madridit, Kylian Mbappe ishte i përmendur goxha shumë në mediume, pasi u bë aksionar në klubin francez, Stade-Malherbe Caen, dhe tani Vinicius Junior e ka bërë një gjë të tillë.
Braziliani ka vendosur të blejë klubin portugez, Alverca me konsorcium.
Nuk është e qartë se sa i kushtoi kjo marrëveshje yllit të Realit dhe se kush janë partnerët e tij, ose sa para do të investojë ai.
Alverca ka njoftuar se pronari paraprak, Ricardo Vicintin e ka shitur pjesën e tij të aksioneve për disa investitorë nga Spanja dhe Brazili.
Klubi portugez është në vendin e dytë, duke shpresuar për një promovim në një ligë më lartë, pasi është vetëm dy pikë larg vendit të parë që mbahet nga Tondela dhe një pikë larg vendit të tretë që mbahet nga Penafiel.
E themeluar në vitin 1939, klubi shpenzoi kohë të madhe të viteve 90-ta në Primeira Liga, por një krizë financiare ka bërë që borxhi prej 5 milionë euro ne vitin 2005 ta dërgojë klubin në administrim. Sezonin e kaluar, klubi arriti që të promovohet në ligën e dytë të Portugalisë.
Alverca gjendet në Alverca do Ribatejo, afër Lisbonës, derisa ka pasur lojtarë të mëdhenj si Deco, Ricardo Carvalho, derisa Jesualdo Ferreira në një pikë të historisë ishte trajner i tyre.
Është e paqartë se sa i përfshirë do të jetë Vinicius, por po duket të jetë një trend për lojtarët e mëdhenj të investojnë në klube modeste.
Viniciusi menaxhohet nga agjencia amerikane “Roc Nation” dhe është po ashtu trend i kohës që lojtarët nga NBA dhe NFL të investojnë e të bëhen aksionar në klube të ndryshme.
