Analisti politik, Visar Ymeri, ka komentuar mundësinë për marrëveshje politike mes partive, për të krijuar institucionet.Ai në një intervistë për Gazeta Blic, ka thënë se bashkëpunimi është normal por që partia më e madhe duhet t’i ftojë partitë tjera për bashkëpunim.
Ai ka thënë se LDK është më entuziaste se PDK për bashkëpunim me VV-në, por që ka disa kushte.“Parimisht mendoj se secila parti bashkëpunimin me një parti tjetër duhet ta shohin si gjë normale. Marrëveshja është gjë e mirë, nuk është gjë e keqe dhe nuk mund ta demonizojnë marrëveshjen politike. Rendi i gjërave megjithatë e do që partia më e madhe t’i ftojë partitë tjera dhe jo që partitë tjera të kërkojnë të ftohen nga partia më e madhe, mirëpo gatishmëri në parim ka edhe PDK, na PDK s’kemi dëgjuar që nuk bashkëpunojnë, ndërsa LDK është pak më entuziaste drejt një bashkëpunimi me VV-në. Megjithatë duhet të jemi më korrekt, nuk janë të bashkëpunojnë në çfarëdo mënyre, së paku nga deklarimet e deritashme, ata kanë kritere për bashkëpunim dhe këto kritere nëse plotësohen duhet ta shohim çfarë qeveria do të bëhet dhe mund të bëhet”, është shprehur ai.
Sipas Ymerit, bashkëpunimi me VV-në është problematik për dy arsye.“Unë besoj se bashkëpunimi me VV-në është shumë problematik për dy arsye: E para, që VV e ka dëshmuar tashmë që bashkëpunimin me partitë tjera nuk e sheh në bazë të barazisë mes palëve por e sheh nga perspektiva e nënshtrimit të tjetrit, që është shumë problematike; dhe e dyta, kur i ki 53 deputetë, është shumë lehtë ta kthesh për së prapështi bashkëpunimin me një parti që i ka 18 deputetë. Në këtë rast mendoj se edhe PDK, edhe LDK duhet të jenë më të kujdesshme kur futen dhe nëse futen në bashkëpunim me VV-në”, ka vlerësuar analisti për Gazeta Blic.
Po ashtu, Ymeri ka theksuar se PDK e LDK nuk duhet ta bartin mbi supe barrën për krijimin e institucioneve, pasi këtë e ka partia fituese.“Tek e fundit, partitë po e marrin për së tepërmi barrën e krijimit të institucioneve për mbi supet e tyre, nuk është mbi supet e tyre, këta duhet të çlirohen nga kjo barrë, është përgjegjësi e partisë së madhe që ta bëjë atë dhe që të lidhë marrëveshje me ta nëse ka nevojë për votat e juaja, pse po i jepni ju zor, se s’kanë nevojë”, ka deklaruar Visar Ymeri./Gazeta Blic/
