Inspektorati i Punës sot ka ‘zbarkuar’ në super marketin “VIVA FRESH” në Shupkovc të Mitrovicës, ku ka konstatuar se ky market po rrezikon shëndetin e punëtorëve në këtë njësi të kompanisë.
Veriu.info ka siguruar nga palët raportuese në proces raportin e Inspektoratit të Punës, i cili ka kontatuar se “VIVA FRESH” në këtë objekt nuk ka ngrohje për punëtorët, ani pse ka obligim ligjor të siguroj ngrohje dhe ambient të përshtatshëm për punë, ku temperaturat janë të ulëta, sikurse janë sot pas reshjeve të shumta të borës.
Po ashtu në raportin e bërë sot nga Inspektorati i Punës në vend të ngjarjes, konstatohet se po shkelen drejtat e punëtorëve, pasi që atyre u takojnë 15 minuta pushim në çdo 90 minuta, kjo në rastet ku në punë janë temperaturat e ulëta, ndërsa “VIVA FRESH” iu jep vetëm 30 minuta pauzë gjatë gjithë ndërrimit të punës, raporton Veriu.info.
Përveç mungesës së ngrohjes, Inspektorati i Punës ka gjetur edhe shkelje tjera nga “VIVA FRESH”, pasi që kjo kompani nuk ka të bërë vlerësimin e rrezikut në punë i obliguar me dispozitën e nenit 16, paragrafi 1 të ligjit 04/l-161 për sigurinë dhe shëndetin në punë.
Shkeljet ligjore të “VIVA FRESH” nuk përfundojnë me kaq, pasi që ky market operon në një objekt që nuk ka dalje emergjente dhe as shenja udhëzuese në objekt.
Veriu.info ka siguruar videon e momentin kur zyrtarët e Inspektoratit të Punës kanë arritur për inspektim në objektin e “VIVA FRESH” në Shupkovc të Mitrovicës.
Veriu.info mëson se pas evidentimit të gjithë këtyre shkeljeve, Inspektorati i Punës pritet t’i shqiptoj gjobë “VIVA FRESH-it”.
SHIKONI VIDEON KËTU
Ndryshe, ditëve të fundit qytetarët janë ankuar se marketet po abuzojnë me rritje drastike të çmimeve të produkteve esenciale ushqimore./Veriu.info
