Pakënaqësitë e brendshme në Serbi dhe rritja e tensioneve në Bosnjë nuk duket që po i pengon udhëheqësit e shteteve evropiane që të takohen me krerët e Serbisë.
Kjo dëshmohet edhe nga vizita e paralajmëruar e presidentit francez Emmanuel Macron, i cili në prill do të takohet me homologun e tij serb, Aleksandër Vuçiq.
Vizita e Macronit në Beograd është kumtuar nëpërmjet një bisede telefonike me Vuçiqin – ky i fundit ka bërë të ditur se beson që miqësia e partneriteti me Francën do t’i sjellë Serbisë përfitime të mëdha.
“Kemi biseduar për të gjitha aspektet e bashkëpunimit biletaral mes Francës dhe Serbisë, ashtu sikruse edhe për udhën evropiane të vendit tonë. Të dy e theksuam rëndësinë e përmirësimit të mëtejmë të marrëdhënieve tona dhe për këtë qëllim u pajtuam të takohemi në prill”, ka shkruar Vuçiq në ‘Instagram’.
Në anën tjetër, edhe Macron ka njoftuar, përmes llogarisë së tij në ‘X’, se ka biseduar me homologun e tij serb për çështje të dyanshme dhe me këtë rast ai ka theksuar se do që Serbia të bëjë përparime në rrugën evropiane.
Afrimi mes Parisit dhe Beogradit është në vazhdën e një sërë takimesh në nivel të lartë; në fillim të vitit të kaluar Macroni e priti në takim Vuçiqin, kurse në gusht ky i fundit e priti në Beograd.
Në këtë takim ishte vënë boja e nënshkrimit në një kontratë në vlerë prej 2.7 miliardë euro me të cilën Serbia ka blerë 12 avionë luftarakë francezë ‘Rafale’ nga prodhuesi francez ‘Dassault Aviation’.
