Ministri i Mbrojtjes i Serbisë, Bratislav Gashiq, dhe ai i Mbrojtjes i Hungarisë, Kristof Salai-Bobrovnicki, nënshkruan sot në Beograd një marrëveshje të rëndësishme në fushën e mbrojtjes, raporton Gazeta Sinjali.
Presidenti serb, Aleksandar Vuçiq, theksoi se bashkëpunimi me Hungarinë në këtë fushë është më i zhvilluar në rajon dhe se të dy shtetet po ecin drejt krijimit të një aleance ushtarake.
Ai tha se marrëveshja përfshin stërvitje shumëkombëshe, bashkëpunim ushtarak-teknik dhe prokurimin e sistemeve të armatimit.
“Ky bashkëpunim është rezultat i marrëveshjes strategjike të vitit 2023 dhe është me rëndësi të madhe për ne”, tha Vuçiq, duke shtuar se pas 26 vitesh, dy shtetet janë në gjendje të ndërtojnë marrëdhënie të ngushta dhe një aleancë ushtarake.
Nga ana e tij, ministri hungarez, Salai-Bobrovnicki, vlerësoi bashkëpunimin me Serbinë si të rëndësishëm në nivel ndërkombëtar, duke theksuar se, edhe pse Serbia nuk është anëtare e BE-së, dy shtetet vazhdojnë të kenë konsultime të nivelit të lartë.
