Presidenti i Serbisë, Aleksandar Vuçiq, ka reaguar ndaj akuzave të Shërbimit të Inteligjencës së Jashtme të Rusisë (SVR) që pretendojnë se Beogradi vazhdon të furnizojë Ukrainën me municion përmes vendeve ndërmjetëse. Vuçiq ka thënë se ka diskutuar drejtpërdrejt me presidentin rus Vladimir Putin, duke mohuar çdo pretendim të tillë dhe duke theksuar se nuk ekziston asnjë kontratë apo leje për dërgimin e raketave.
Ai pohoi se është krijuar një grup pune me partnerët rusë për të hetuar pretendimet, ndërsa theksoi se disa nga akuzat janë të pavërteta. Vuçiq shtoi se industria ushtarake serbe punëson rreth 24 mijë persona dhe se armët po përdoren vetëm për nevojat e ushtrisë së Serbisë.
Nga ana tjetër, SVR akuzon ndërmarrjet serbe se po shfrytëzojnë certifikata të rreme dhe vende ndërmjetëse për të furnizuar Ukrainën. Sipas raporteve, Serbia ka eksportuar municion në Ukrainë në vlerë prej 800 milionë eurosh që prej fillimit të luftës në vitin 2022, përmes kanaleve të palicencuara. Vuçiq mohon çdo përfshirje direkte dhe i cilëson akuzat si të pabaza.
