Paneli Zgjedhor për Ankesa dhe Parashtresa (PZAP) e ka konsideruar si të pabazuar një ankesë të Lëvizjes Vetëvendosje kundër kryetarit të Srpska Demokratja, Aleksander Arsenijeviq.
VV-ja është ankuar se Arsenijeviq pengoi Kurtin në aktivitetin e paraparë në kuadër të fushatës dhe përdori gjuhë ofenduese ndaj kryeministrit. Arsenijeviq u arrestua nga Policia e Kosovës ditë më parë në veri të Mitrovicës.
LVV pretendon se Arsenijeviq ka filluar të ofendojë dhe të përdorë gjuhë ofenduse ndaj Kurtit dhe ministrave prezentë. Nëpërmjet kësaj, VV pretendon se Arsenijeviq ka shkelur nenin 34 të Ligjit për Zgjedhjet e përgjithshme, shkruan Insajderi.
“…Aty doli Aleksander Arsinjeviq kryetar i Srpska Demokratja që tentoj ta pengoj aktivitetin i cili është paraparë në kuadër të fushatës, filloj të ofendoj, duke përdorur gjuhë ofenduese dhe me zë të lartë dhe duke i fishkëlluar kryeministrit Kurti dhe ministrave e deputetëve që ishin ne shoqërim të tij, duke nxitur urrejtje, fyerje të kandidatit përkryeministër me ku me atë rast ka shkelur nenin 34 par.1 nën. Par.1.4 dhe 1.7 të Ligjit për Zgjedhjet e Përgjithshme, kjo fillojë të nxitë tensione dhe i njëjti arrestohet nga Policia e Kosovës, pasi nuk përfilli rekomandimet dhe kërkesat që i njëjti të ndalet, të mos ofendojë dhe të mos fishkëllejë pasi që kjo pengonte aktivitetin”, thuhej ndër të tjera në ankesën e VV’së.
PZAP ka thënë se VV’ja lidhur me këtë ka bashkëngjitur vetëm një video incizim dhe, si rrjedhojë, ka mungesë faktesh.
“Pretendimet ankimore të parashtruesit të ankesës lidhur me shkeljen e pretenduar nga ana e kandidatit nga radhët e subjektit politik Srpska Demokratija, Aleksandër Arsenijeviq, Paneli i vlerësoj se janë të pa qëndrueshme dhe si të tilla i refuzoj, për faktin se veprimet e përshkruara në ankesë nuk paraqesin ndonjë nga shkeljet e pretenduara, kjo pasi që parashtruesi i ankesës ka bashkangjitur vetëm një video incizim, ku shfaqej Arsenijeviq duke fishkëlluar e që për Panelin nga këto pamje të shfaqura në këtë video nuk mund të merret se i njëjti ka shkelur nenin 34 par.1 nën. Par.1.4 dhe 1.7 të Ligjit për Zgjedhjet e Përgjithshme gjegjësisht se ka bërë çrregullimin apo pengimin e ndonjë tubimi të ndonjë subjekti politik, pasi që në ato pamje të shfaqura nuk vërehet se është duke u mbajtur ndonjë tubim zgjedhor i subjektit politik në fjalë.
Paneli nuk mund ta merr si te mirëqenë dhe të vërtet pretendimin për të cilin pala ankuese ju është referuar, prandaj lidhur me këtë çështje PZAP-i, ankesën e parashtruar e konsideron të pa bazuar në fakte, dëshmi të qarta dhe bindëse konform dispozitës ligjore të nenit 117 paragrafi 3 dhe 118 paragrafi 1 të LZP-së, dhe mbi këtë arsye vendosi si në dispozitiv të këtij vendimi”.
